تربت: کیچ دمگدار ءِ کارگس ءِ دیم ءَ زور بیگواھیں مردمانی کھولانی نیمگ ءَ برجاھیں زھرشانی نندانک پولیس ءَ انشی دوازدہ ءَ انگر کرتگ ءُ زھرشانی ءَ نشتگیں مردماں دزگیر کنگ ءِ گمان اِنت۔
اھوالکار ءِ رد ءَ مرچی روچ ءَ تربت پولیس ءَ نندانک ءِ مردمانی بستگیں درسیں دگ پچ کرتگ اَنت۔ دوشمبے ءِ روچ ءَ زور بیگواھیں مردمانی کھول ءِ زھرشانی نندانک ءَ دہ روچ سرجم بوتگ۔ بلے چہ واکدار ءِ نیمگ ءَ پہ آیانی لوٹانی منگ ءَ ھچ وڑیں دلجمیں گامگیج زورگ نہ بوتگ۔
یات بہ بہ اِت کہ زور بیگواھیں مردمانی کھولانی زھرشانی ءِ اے سیمی رند اِنت کہ کیچ دمگدار ءِ کارگس ءِ دیم ءَ برجاہ دارگ بوگ ءَ اِنت۔
