شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5518 روچ سرجم بوتگ۔ یک شمبے ءِ روچ ءَ مھمد امین مگسی ایدوکیٹ، سدام ایڈوکیٹ، امران میروانی ایڈوکیٹ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِکمک سرکماش ماما کدیر گوں مردماں تران کرتگ ءُ گوشتگ کہ زورگریں پاکستان ریاست ءَبلوچ پسگاں زور بیگواہ کنگ ءُ دزگیری ءَ پد کوش ءِ درچ گوں ترندی ءَ برجاہ اِنت۔ بلکیں جتائیں زور چکاسگ ءُ بلوچ راج ءِ چہ ھستمان ءَ ھلاس کنگ ءِ جھد ءَ اِنت۔ بلوچستان ءَ چوشیں جاہ نیست کہ اود ءَ زورگریں ریاست ءِ لشکر ءَ زوراکی نہ کرتگ۔
آئی ءَ گوشتگ کہ مری، بگٹی، مکران، بولان ءُ ھزدار ءَ جتائیں ھنداں بلوچ آبادیانی بگیری ءَ بے ترس ءَ گوستگیں چنچو سال اِنت کہ کاروائی برجاہ اَنت۔ لشکرکشیانی میان ءَ بلوچ آبادیانی سر ءَ زھرناکیں سلاھانی چکاسگ دودے جوڑ بوتگ۔ بلوچ ءِ گدانانی سر ءَ لشکری ءُ جنگی بالگردانی بمگواری کنگ انوگیں گپے نہ اِنت۔ لشکرکشیانی میان ءَ ھزارانی کچ ءَ بلوچ کہ آیانی تہ ءَ بازیں کچے ءَ جنین ءُ زھگ ھوار اَنت آیانی مرگ ءِ باراو کس سرپد نہ اِنت۔
ماما کدیر گوشتگ کہ اکوام متھدہ ءِ مردمی ھکانی ادارہ ءِ جارکش ایمنسٹی انٹر نیشنل ءَ بلوچ راج ءِ باروا جوانیں گامگیجے زرتگ بلے اے مزنیں جیڑہ ءِ پہ گیش ءُ گیوار ءَ انگت ءَ بے سوب بوتگ۔ بلوچستان ءِ جاور تیوک ءَ چہ گزرشانی شنگ کنگ ءَ نہ بلکیں میان استمانی ادارھانی زوتیں دزمانجنی ءِ لوٹ ءَ کن اَنت۔
