کراچی: جنینانی روانک ءِ نیمگ ءَ ھشت مارچ جنینانی میان استمانی روچ ءِ درگت ءَ برجاھیں مراگش ءَ بیگواھیں بلوچانی توار( وی بی ایم پی ) ءِ کار گشاد سمی دینءَ تران کرتگ ءُ گوشتگ کہ زندگی ءِ پانزہ سال من گوں کجام درد ءُ آزاراں گوازینتگ اَنت من آیاں ءَ وتی زور جوڑ کرتگ ءُ مرچی من بلوچستان ءِ ھزارانی کچ ءَ زور بیگواھیں مردمانی کھول ءِ توار جوڑ بوتگ آں۔ من پہ آیانی آجوئی ءَ برے شال، برے کراچی ءُ اسلام آباد ءَ شتگ ءُ توار چست کرتگ۔
آئی ءَ گوشتگ کہ من بلوچستان ءِ جھمننداں چوش کہ مئے گوستانک ءَ چار ئے گڑا بلوچ جنینانی ھما بستار اِنت آ چاگرد ءِ تہ ءَ باز شرپ دیگ بیت۔ ھما کہ نوک آباد کار چہ ھپتاد سالاں مئے سر ءَ دیگ بوتگ آئی پھم ھمیش اِنت کہ ننگ ءِ نام ءَ مردم کشگ بہ بنت۔ گوستگیں روچاں گریشگ ءَ جنکے کہ گوں آئی وانگجاہ ءِ ماسٹر ءَ پہ زور نکاہ کرتگ۔ آئی بگیری ءَ انگت ءَ ھچ وڑیں کانود ءِ نیمگ ءَ کاروائی کنگ نہ بوتگ۔
سمی دین ءَ گوشتگ کہ نجمہ بہ بیت یا شاھینہ شاھین ءِ کوش ما گندگ ءَ ایں اے پارست ءَ کج ءَ نہ کج ءَ ریاست ءِ دست مان اِنت۔ بلے شما ھمے بہ جیڑ اِت ما اد ءَ ریاست ءِ نام ءَ پرچا کار ایں، من ھمے گوشگ لوٹاں کہ گراناز ءِ جنک ءُ آئی دو براس کشگ بیت، اود ءِ ھندی سردار ابدرھمان کیتران آئی وتی زاتی زنداناں بندیگ کنگ بوتگ اَنت پد ءَ آئی زھگانی لاش دست کپ اَنت، ھما ابدرھمان کیتران پی پی ءِ سرکار ءَ سیٹ زورگ ءَ اِنت بلے انگت ءَ کس ءَ جست نہ گپتگ۔ ما بلوچستان ءِ ھما جنین ایں کہ زوراکیانی آماچیں، جنینانی ننگ ءِنام ءَ کشگ بہ بیت یا چادر ءُ چاردیوالیانی تہ ءَ بند کنگ ءِ درچ برجاہ اِنت دومی نیمگ ءَ ما چارگ ءَ ایں کہ ریاست ءِ نیمگ ءَ مردمانی زندمان جنجالانی دیمپان اَنت۔
سمی دین ءَ گوشتگ کہ من ھما زوریں بیگواھی ءِ گپ ءَ کنگ ءَ آں ھما زوریں بیگواھی ءَ بلوچستان ءِ ھمک گس ءَ گیشتر جنین سانمند کرتگ اَنت۔ من ھمے سرپد باں کہ بلوچ جنین ھمائی گھگیری ءِ بنیاد ءَ وتی نام گوستانک ءِ تہ ءَ زندگ داشتگ آ گھگیری ءِ چیدگ جوڑ بوتگ۔ اگاں ما جھان ءِ تہ ءَ گھگیری ءِ چیدگاں چاراں گڑا بلوچ جنین چہ درساں دیم ءَ اِنت۔ ایشی سوب ھمیش اِنت پہ بلوچ جنینانی توار ءِ دارگ ءَ ھرپیمیں زوارکی چکاسگ بوگ ءَ اَنت، بلوچستان ءَ بلوچ پیرزالانی دگانی سر ءَ گرکنگ، لٹ شاپ کنگ، آیانی زھگانی سالانی سال زوریں بیگواھی، درکانودی کوش ءِ بگیری ءَ ھمے ماس ءُ گھار پہ وتی آزیزانی بارو ءَ جست گر اَنت سرکار ءِ نیمگ ءَ آ ناشرکار گوشگ بنت۔
آئی ءَ گوشتگ کہ ڈیھ اے گپ ءَ الم زانت کہ بلوچستا ن ءَ سی پیک، سیندک ءُ گیس ھست، مادن در آھگ ءَ اِنت۔ ھما سی پیک ڈیھ ءِ نسیب ءِ مٹ کنوک گوشگ بیت، چہ آئی ءَ مزن ھور جوڑ بوگ ءِ واب ءَ گند اَنت، ھما سی پیک ءِ شھر گوادرءَ پہ ورگ ءَ آپ نیست۔ ھما مردماں دہ روچ بیت کہ چہ ھارآماچی ءَ جتائیں نادراھیانی آماچ اَنت بلے آیانی ھال ءِ جست گروکیں کس نیست۔ ما بلوچستان ءِ ھما راستیں دروشم ءَ دیم ءَ آرگ لوٹ ایں گڑا مئے گوں ھرپیمیں ھیلھاں دارگ ءِ جھد کنگ بیت۔
سمی دین ءَ گوشتگ کہ ما ھمے دیستگ بلوچ جنیناں ھمک وھد ءَ ریاست ءِ زوراکیانی بگیری ءَ گھگیری کرتگ، ایشی راستیں منانک ھمیش اِنت کہ بلوچ جنیناں گوستگیں روچاں اسلام ءَ گھگیری کرتگ ءُ پیش داشتگ۔
