گوادر: شال ءَ زھرشانی کنوکانی سر ءَ پولیس ءِ بیڑ برگ ءُ زوراکیانی بگیری ءَ ھک بہ دے اِت زرمبشت ءِ نیمگ ءَ زھرشانی روانکے کشگ بوتگ۔ روانک چہ جاوید کمپلیکس ءَ بندات بوتگ ءُ مکی مسیت ءِ دیم ءَ آسر بوتگ۔
زھرشانی ءَ زور بیگواھیں مردمانی کھول، جنین ءُ زھگ، سیاسی ءُ چاگردی کارکناں ھوار لس مردماں بازیں کچے ءَ بھر زرتگ۔ زھرشانی ءَ ھواریں مردما ں زوریں بیگواھی ءُ شال ءَ پولیس ءِ زوراکیانی بگیری ءَ اوگام جتگ۔
زھرشانی کنوکیں مردماں تران کرتگ ءُ گوشتگ کہ پہ اسلام نام ءِ سر ءَ جوڑ بوتگیں ریاست گوں وتی لس مردمانی گیرت ءَ لیب کنگ ءَ اِنت۔ اے چونیں اسلامی ریاستے کہ مردماں زوراکیانی بگیری ءَ گپ کنگ ءِ ھک نیست ءُ زور بیگواھیں مردمانی ژانگولیں لاش چگل دیگ بوگ ءَ اَنت۔
آیاں گوشتگ کہ مردم زوریں بیگواھی ءِ آماچ کنگ بوگ ءَ اَنت بلے اے مردم بیگواہ نہ اَنت ریاستی چیریں آزارجاھاں بندیگ اَنت۔ اے باید اِنت کہ بیگواہ گوشگ مہ بنت۔ ریاستی چیریں بندیگجاھاں بیگواھیں درسیں مردم بے میار اَنت۔
