شال: 27 جون ءَ پاکستانی لشکر ءِ دست ءَ زور بیگواہ کنگ بوتگیں زھیر اھمد ءِ کھول ءُ وکدار ءِ میان ءَ گپ ءُ تران سوبین بوتگ ءُ زھرشانی نندانک ھلاس کنگ بوتگ۔
اے باروا بلوچ یکجھتی کمیٹی ءِ سروک ڈاکٹر ماہ رنگ ءَ ماں چاگردی رسانکدر ایکس ءَ نبشتگ کہ مرچی پہ زھیر ءِ آجوئی ءَ برجاھیں زھرشانی نندانک ءَ سرکاری ٹولی ءُوکدار ءِ گون ءَ گپ ءُ تران بوتگ۔ ایشی زھیر ءِ زوریں بیگواھی ءِ ایپ آئی آر سی ٹی ڈی ءِ بگیری ءَ نبیسگ بوتگ، یازدہ جولائی ءَ چہ دزگیر بوتگیں زھرشانی کنوکاں 21پولیس ءِ بندیگ بوتگ اَنت چہ آیاں 15 انوں یل کنگ بوتگ ءُ شش دوشمبے ءِ روچ ءَ آمیدگس ءِ پچ بوگ ءَ پد یل کنگ بنت۔ 11 جولائی ءَ زھرشانی کنوکانی سر ءَ بوتگیں درسیں ایپ آئی آر ھلاس بنت۔
آئی ءَ گوشتگ کہ پہ زھیر ءِ آجوئی ءَ آئی کھول ءِ ھواری ءَ یک پترے جوڑ کنگ بوتگ کہ آ داں پانزہ روچاں پہ زھیر ءِ آجوئی ءَ جوانیں کردے پیلو کنت ءُ اگاں داں پانزہ روچاں پتر ءَ پہ زھیر ءِ آجوئی ءَ کرد پیلو نہ کرت گڑا آئی کھول پد ءَ زھرشانی ءَ برجاہ دار ایت۔
