بلوچ آجوئی لوٹوکیں راھشون استاد واھد کمبر ءَ گْوشتگ درسیں آجوئی لوٹوکیں گل جنگی راھبنداں منگہ بہ دے اَنت۔ بلوچ ءَ ماں وتی آجوئی ءِ جنگ ءَ جنین، چک ءُ بے میاریں مردم ھچ رنگیں تاوان دیگی نہ اَنت۔مئے جنگ تچکے ءَ ھما واک ءِ بگیری ءَ بہ بیت کہ مارا چیردست ئِے کرتگ ءُ مئے ڈیھ ئِے گپتگ۔
آئی ءَ گْوشتگ من چہ بی ایل ایپ ءِ پجیگ ءَ درسیں آجوئی لوٹکیں گلاں دزبندی کن آں کہ آ ھمک جاوراں جنگی راھبنداں منگہ بہ دے اَنت۔ بلوچستان ءِ سر ءَ پاکستان ءِ زور گری ءَ پد چہ 1948 ءَ بہ گر داں انی آجوئی ءِ جنگ برجاہ اِنت۔ ھمے درسیں باریگاں بلوچ ءَ ماں جنگ ءِ پڑ ءَ پیش داشتگ کہ آ پرمڑاھیں ربیدگ ءُ دودمان ءِ واھند اِنت ءُ جنگی راھبندانی پاسداری ئِے کرتگ۔ھمے پیم مارا ھم وتی پیرینانی گْوستانک دیم ءَ ایر کنگ ءُ چوشیں کارے ءَ پھریز کنگی اِنت کہ آ جنگی میار لیکگ بیت۔
استاد واھد کمبر ءَ گْوشتگ جھان ءَ الم ءَ چوشیں جنگ بیتگ کہ آیانی تہ ءَ توانمنداں چیردستانی بگیری ءَ جنگی میار کرتگ چوش کہ اسٹالن ، ہٹلر ءُ مسولینی ءَ جنگی میار زرتگ۔آیاں ھزاراں یھودی گیس چیمبراں مان کرتگ ءُ کشتگ ، چک ءُ جنین بے بند ءُ داری کشتگ۔چہ آیانی زوراکی ءَ لکاں مردم چہ وتی پت ءُ پیرکی ھنکیناں لڈ اتگ ءُ در پہ در بیتگ۔
آئی ءَ گْوشتگ گْوستانک ءَ زوراکی کنوکاں بدتریں رنگے ءَ پروش ھم بیتگ ءُ آ بدنام ھم بیتگ اَنت۔ راست اِنت کہ بلوچ آجوئیں مھترھندے ءِ واھند نہ اِنت بلے کْوھنیں راجے کہ آئی ءَ وتی ھزاراں سال ءِ گْوستانک ءَ لیکھی جنگ ھم کرتگ ءُ پہ وتی مانشست ءَ گھگیری ھم کرتگ۔ مارا وتی دشمن ءِ وڑ ءَ کپتہ آپ بیگ نہ لوٹ ایت کہ آئی ءَ دودمان ھست ناں شانداریں گْوستانک۔ جھان من ایت کہ مروچیگیں زمانگ ءَ آجوئی ءِ راستیں زْرمبشتانی تہ ءَ یکے بلوچ راجی زْرمبشت اِنت۔ اے جاہ بلوچ زْرمبشت چہ شھیدانی دیمونی ءُ مئے لیکھی راھشونانی دید ءِ پد ءَ رس اتگ ، اے انیگیں راھشون ءُ جنگ ءِ پڑ ءَ ساڑی ئیں سرمچاراں پھریزگی اِنت۔ گْوستانک ءَ بلوچ راج ءِ مڑاہ ءُ وشنامی ءِ برجاہ دارگی اِنت۔
