بلوچ اسٹوڈنٹس ایکشن کمیٹی ملیر ھنکین ءِ نیمگءَ یک وانگی دیوانے ھنکین ءِ کارمستر سنگت شاہ تاج ءِ سروکی ءَ برجم دارگ بوتگ۔ دیوان ءِ گچینی مھماان گل ءِ بنجاھی رسانکدری کارگشاد سنگت اُزیر بوتگ۔دیوان ءِ سرھال: راجدوستی ءُ بلوچ راجدوستی بوتگ ءُسنگت عزیر ءَ تران کرتگ۔
سنگت ءَ دیوانءِ بِندات ءَ راج ءُ راجدوستی ءِ سرءَ تران کنان ءَ گوْشتگ کہ مردمانی ھما مچّی، ٹولی یا یکجھہی کہ آ یک گچینیں ڈیھ ءُ سر زمین ءِ سرءَ جاھمنند بہ بنت ءُ زِند بہ گوازین اَنت، آھانی یکجھہیں( مُشترکہ) زبان، دود ءُریبدگ، راجدپتر، نپسیات ءُ سیاسی ءُ مالی درگت ءَ یک بیگ ءَ ھوار آھانی ھیال ءُ لیکہ وت ماں وت بندوک بہ بنت آ یک راجے گوشگ بیت۔ راج ءِ سر ءَ جتائیں لیکہ ءُ ھیال ھست اَنت بلے آئی ءِ بُن دپتر ءِ سر ءَ دو ھیال اَنت یکے پری مورڈیل ءُ دومی موڈرنیسٹ اِنت۔ پریمورڈئیل ءِ منگ اِنت کہ راج گوستءَ چہ بیتگ ءُ انسان ءِ ھون ءَ ھوار اِنت ءُ پیداک اِنت، بہ زاں راج گوست ءَ چہ بیتگ ءُ کم کم ءَ دیمروئی کنان ءَ مرچی اے دروشم ءَ اتکگ۔ دومی موڈنرسٹ ھیال ءِ منوگرانی گوْشگ اِنت کہ راج یک نوکیں چِزے ءُ یورپ ءَ اشی ءِ بُن ھِشت ایر کنگ بیتگ بہ زاں راج یورپ ءِ پیدا کُتگیں یک چزے کہ ھما مردماں گوْشگ بیت کہ آھانی وتی جتائیں زمین، زبان، دود ءُ ربیدگ ءُ تب ئے بہ بیت ءُ آ وتءَ یک بہ گوش ایت راجے گُشگ بیت۔ بہ گُپت ارنسٹ رینن کہ راج یک روحانی شئے ئے، بہ زاں راج ھما مردمانی ارواہ ءَ گوں بندوک اِنت۔ دو چِز اَنت کہ راج ءَ ارواہ ءُ بالاد ءِ پیم ءَ جوڈین اَنت گوْست ءُ ھست ءِ یات۔ یک راجے ءِ گْورءَ گوست ءِ یاداشت بنت کہ مردماں نزیک کن اَنت ءُ دومی ھست ءَ آھانی یکجاھی ءَ نِندگ ءُ زِند گوࣿازینگ ءِ ھُب ءُ واھگ اِنت۔ پہ مردماں گوْست ءِ دپتر میراس بیت ءُ آھانی یاداشت یک بیت ءُ ھست ءَ گشین ایت ءُ راج ءَ زِندگ کنت۔
سنگت ءَ دیمتر ءَ تران کنان ءَ گوْشتگ کہ دومی راجدوستی اِنت، روج دوستی بہ زاں نیشنلزم راج ءِ جوڈ کنگ ءُ آئی ءِ سرجمیں تک ءُ پھناتانی رکینگ ءَ راج دوستی گْوش اَنت۔ راج دوستی ءِ سرءَ جتائیں زانتکار ءُ سیاسی رھشوناں وتی وتی لیکہ گوْشتگ اَنت پہ درور لھتے گوْش ایت وتی راج ءِ وتواجھی رکینگ، راج ءِ زمین، زُبان ءُ دود ءَ ربیدگاں ھوار کُل شئے آں رکینگ ءِ امل راج دوستی اِنت۔ یکے گوش ایت کہ راج ءَ ھچ ءَ چہ زیرگ ءُ آرگ یک راجے جوڈ کنگ ءِ امل راج دوستی اِنت۔ ھمے پیم ما گِند ایں کہ راج دوستی دومی مزن جھانی جنگ ءِ میان ءَ ءُ پد گیشتر دیم ءَ کئیت ءُ دنیا ءَ سیاست ءِ بھر بیت چوشکہ اے میان ءَ بازیں ایردستیں راجے راج دوستی ءِ لیکہ ءَ زیر ایت ءُ کالونائزیشن ءِ بگیری ءَ وتی وتواجھی ءَ جھد ءَ دیم ءَ بارت ءُ سوبین بیت۔
دیوان ءِ دیمتر ءَ سنگت ءَ بلوچ راج ءُ راجدوستی ءِ سرءَ تران کنان ءَ گوࣿشتگ کہ بلوچ ھما راج اِنت کہ آئی ءِ جتائیں تچکیں زمین، زبان، دود ءُ ربیدگ، تب ءُ زِند گوازینگ ءِ رواجے ھست کہ وتی کش ءُ گور ءِ ھمساھگیں راج ءُ مھلوک ءَ چہ جُتا اِنت۔ بلوچ یک ناسرجمیں راجے کہ وتی راج ءِ جوڈینگ ءُ رکینگ ءِ جُھد ءَ اِنت۔ بلوچ ءِ گورءَ راج دوستی ءِ مُھکم بیگ ءِ باز درور ھست کہ آ گوں زمین ءُ راج ءَ بندوک اَنت پہ درور بلوچ وتی زمین ءُ گُلزمین گوش ایت بہ زاں پُل ءِ زمین، یا روہ ءِ بھشتِ زمین بہ زاں ھما زمین کہ بھشت ءِ چھرگ ءَ جنت۔ بلوچ ءِ گوْست ءِ یاداشت ءَ بلوچ ھست ءَ یک ءُ یکجاہ کرُتگ کہ آ وت ءَ یک جتائیں راجے لیک ایت۔ بلوچ راجدوستی ءِ لیکہ بلوچ سیاست ءِ تہ ءَ نہ ایوکءَ مھکمیں سیاسی لیکہ ئے بگندے بلوچ راج ءِ مدامی سیاسی لیکہ بوتگ ءُ پیداک اِنت۔ بلوچ راجدوستی ءِ لیکہ بلوچ چاگرد ءِ تہ ءَ درستیں تبکّاں چہ سیادی داروکیں مھلوکءِ لیکہ اِنت۔ بلوچ ءِ گورءَ زبان یکے ءَ چہ گیش اَنت بلے آئی ءَ گْوست، دود ءُ ربیدگ ءُ زمین یک اِنت، بلوچ ءِ گوْر ءَ زِند گوازینگ ءِ چاگرد ءِ تہ ءَ کانود ءُ ایمنی آرگ ءَ بلوچی رواج ھست اِنت۔ پمیشکا بلوچ ءَ وت ءَ نہ تھنا گشینتگ بلکیں منارینتگ ھم کہ بلوچ یک راجے کہ وتی استان ءِ رکینگ ءُ راج ءِ سرجمیں تک ءُ پھناتانی پھازگ ءِ جھد ءَ راج دوستی ءِ لیکہ زُرتگ ءُ دیمءَ جُنزان اِنت۔
دیوان دلجمی ءَ گوں سرجم بوتگ ءُ دیوان ءِ آسرءَ سنگت ءَ جستانی پسّو داتگ اَنت ءُ چہ کارمستر ءِ موکل ءَ دیوان ھلاس کنگ بوتگ۔
