کابل: اوگانستان ءَ اوگان لشکر ءُ تالبان ءِ میان ءَ جتاجتائیں دمگاں تْرندیں جنگ ءُ چوپ برجاہ اِنت۔بازیں دمگاں جاور ھال پدر نہ اَنت،دری رسانکدر،ھندی واکدار ءُ بنجاھی سرکار ءِ درشان جتاجتا اَنت۔
اوگانستان ءِ وزیر دیمپانی ءِ گْوشگ اِنت کہ دھدادی دمگ ءُ بلک استان ءِ بنجاھی شھر مزار شریپ ءَ تالبان ءِ اُرش سرکاری لشکر ءَ بےسوب کُرتگ اَنت ءُ تالبان پد کِنزگ ءَ لاچار کُرتگ۔ وزیر دیمپانی ءِ کمک جارکش پواد امان ءَ زیکیں روچ ءُ مرچیگیں روچ ءَ ٹویٹر ءَ اے بابت ءَ نبشتگ کہ تالبان ءِ دھدادی ءُ مزار شریپ ءَ اُرش اوگان لشکر ءِ گھگیری ءِ سْوب ءَ بےسوب بیتگ اَنت۔
امان ءَ گْوشتگ کہ اے میڑاں اوگان لشکر ءَ تالبان باز جانی تاوان داتگ اَنت۔
بلک پولیس ءِ سروگان ءَ گْوشتگ کہ اوگان لشکر ءُ تالبان ءِ بگیری ءَ گھگیری کنوکیں مردم بلک استان ءِ پُھل امام بکری ءُ دھدادی دمگ ءِ میتگ توکتہ ءَ میڑ برجاہ اِنت۔مردماں تالبان ءِ اُرش داشتگ اَنت۔
بلک پولیس ءِ گْوشگ اِنت کہ جنگی بالیگراباں تالبان ءِ دستیگ کُرتگیں جاھانی سر ءَ بمبگواری کُرتگ چہ ایشی ءَ بازیں تالبان جنگولے مُرتگ ءُ ٹپی بیتگ اَنت۔
بلک پولیس ءِ سروگان ءَ گْوشتگ کہ تالبان چہ اے جاھاں تتکگ ءُ دمگ ءِ جتاجتائیں جاھاں شنگ اَنت ءُ جنگ کنگ ءَ اَنت۔
دومی نیمگ ءَ تالبان ءِ گْوشگ اِنت کہ آیاں مزار شریپ ءَ کود برک ءَ اوگان راجی لشکر باز تاوان داتگ۔بلک استان ءِ دمگ دھدادی ءُ سمنگان استان ءِ بنجاہ ءِ سر ءَ تالبان ءَ یکشمبے ءِ شپ ءَ اُرش کُرتگ اَت۔
بنشون: پواد امان/ھشت سُھب | اکس: ھشت سُھب
