بلوچ یکجھتی کمیٹی ءَ ماں رسانکدر ءَ وتی شنگ شنگ کرتگیں درشانے ءَ گوشتگ کہ بلوچ یکجھتی کمیٹی ءِ بلوچ چکچینی ءِ بگیری ءَ جھد برجاہ اِنت ۔ ھمے درگت ءَبلوچ یکجھتی کمیٹی ھمے ماہ ءِ 28ءَ بزاں 28جولائی ءَ ماں گوادر ءَ یک مزنیں راجی مُچی یے کنگ ءَ اِنت ۔ بلوچ راجی مُچی بلوچ نسل کشی ءُ بلوچستان ءَ پاکستان ءِ ھرچ وڑیں زوراکیانی بگیری ءَ بوھگ ءَ اِنت۔
آئی ءَ گوشتگ کہ بلوچ راجی مُچی ءِ بنداتی مول سرجمیں بلوچ راج ءَ پاکستان ءِ زوراکی ءُ بلوچ چکچینی ءِ بگیری ءَیکجاہ کنگ اِنت ءُ ھمک ھما بلوچ آ کہ بلوچ سرڈگارءِ کجام ھم کنڈا نشتگ ءُ پاکستان ءِ زوراکیانی آماچ اِنت آھانی یکجاہ کنگ، بلوچ راج ءِ نیام یکجاھی ءُ یکمشتی ودی کنگ ءُبلوچ راج ءِ لس مردمی ءِ بنیاد ءَچہ وتی سرڈگار ءَ پاکستان ءِ زوراکیانی ھلاس کنگ ءُ بلوچ راج ءَ پہ یک وشھالیں زندمانےءَ راہ گشینگ لوٹ ایت۔
آئی ءَ گوشتگ کہ ما اوست دار ایں سرجمیں بلوچ راج آھانی تہءَ زالبول، گونڈو، ورنا، کماش بلوچ سرزمین ءِ کجام ھم کنڈ ءَ نشتگ اَنت آ بلوچ راجی مُچی الم بھر زور اَنت ءُ بلوچ راجی جھدءِ تہ ءَ وتی کسان ءُ مزنیں کردے پیلو کن اَنت ۔ چہ ایشاں ابید ما بلوچ چاگرد ءِ سرجمیں سیاسی، چارگردی ، ھند، گل، پارٹی، انجمن ءُ کسان کسانیں راھبنداں گوں بندوکیں درسیں مردماں دزبندی کن اینکہ بیا اَنت راجی مُچی ءَ ھوار بہ بنت۔
