شال: پاکستانی لشکر ءِ دست ءَ زور بیگواہ کنگ بوتگیں زھیر اھمد ءِ کھول ءِ نیمگ ءَ سریاب دگ ءَ چار روچ اِنت زھرشانی نندانک برجاہ اِنت۔ زھرشانی ءَ کھول ءَ ھوار آدگہ سیاسی چاگردی کارکن ءُ بلوچ یکجھتی کمیٹی ءِ سروک ھم نشتگ اَنت۔
زھرشانی ءَ نشتگیں مردمانی گوشگ اِنت کہ مئے زھرشانی ءَ چار روچ سرجم بوتگ بلے چہ سرکار ءِ نیمگ ءَ انگت ءَ ھچ وڑیں دلجمیں گامگیج زورگ نہ بوتگ۔ گرم ءِ سر ءَ کسانیں زھگ ءُ جنین سکا جنجالانی دیمپان اَنت۔ واکدار پہ اے جیڑہ ءِ گیش ءُ گیوار کنگ ءَ سنگین نہ اَنت، پہ بلوچ ءَ ریاست ءِ درسیں ادارھانی دروازگ بند کنگ بوتگ اَنت۔
آئی ءَ گوشتگ کہ پہ زھیر اھمد ءِ آجوئی ءَ زھرشانی ءَ روانکے کشگ بوتگ ءُ انشپی چاگردی رسانکدر ایکس ءَکمپینے ھم برجاہ اِنت۔ ما گون درسیں بھرگاں سیادی داروکیں مردماں لوٹ کن ایں کہ پہ زھیر ءِ آجوئی ءَ مئے گون ءَ کمک بہ کن اَنت۔
