شال ءَ وی بی ایم پی ءِ زھرشانی گدان ءَ 5500 روچ سرجم بیتگ اَنگت برجاہ اِنت۔
مرچی پہ ھمدردی درشان کنگ ءَ بی ایس او پجار ءِ پیشگیں سرکماش زبیر ، نیشنل پارٹی ءِ کلانھیں باسک گپار کمبرانی ءُ ھدا رھم ءَ ھوار دگہ مردم ھم اتکگ اَنت۔
وی بی ایم پی ءِ سرکماش ماما کدیر ءَ گوں مردماں تران کنان ءَ گْوشتگ: وھدے کہ زور، زوراکی ءُ رستری درسیں سیمسراں گْواز کنت گڑا مردم پہ وتی ھکانی پَد جنگ ءَ چِست بنت ءُ پد ءَ راج ھنچوش توانمند بنت کہ ھچ وڑ ءَ دارگ نہ بنت۔
آئی ءَ گْوشتگ کہ مرچی بلوچستان ءَ ھرچی پارلیمانی ءُ در پارلیمانی گل ھست آ یک ءُ دومی ءِ بھتام جنگ ءَ گیش نہ بنت۔چہ وتی شھیدانی دیمونی ءُ ھزاراں بلوچانی اوستاں بے اوستی ءِ دْروشُم دیگ ءَ اَنت۔دومی نیمگ ءَ دُرسیں بلوچ ورنایاں گوں دلجمی ءَ بلوچستان ءِ جُھد ءَ وتی ھون ءُ ھیداں ریچگ ءَ اَنت۔بلوچ ورنایانی راہ ءُ منزل یکین اِنت،باز جاھاں بھر اَنت بلے دُرسانی منزل یکین اِنت۔
ماما کدیر ءَ گْوشتگ کہ پہ زوراک ءَ چادر ءِ چاردیوالی ءِ پادمال کنگ نوکیں گپے نہ اِنت، اِد ءَ ھمک روچ ماتانی مھر چہ چکاساں گْوزگ ءَ اَنت،ھمک روچ آیانی چمانی رژن ءُ باندات ءِ اوست چہ آیاں پُلگ ءُ تھاریاں چگل دیگ بیگ ءَ اَنت ءُ راجمستری ءِ پھازوک چہ ھمے گپ ءِ گْوشگ ءَ دم نہ بر اَنت کہ ما بلوچستان ءِ ایمنی جُھد ءَ گُلائیش ایں۔
