تربت: کیچ دمگدار ءِ کارگس ءِ دیم ءَ برجاھیں زھرشانی نندانک ءَ زوربیگواھیں مردمانی کھول ءُ واکدار ءِ میان ءَ گپ ءُ تران سوبین بوتگ، دہ روچ ءِ وھد لوٹءَ زھرشانی نندانک ھلاس کنگ بوتگ۔
چہ زھرشانی نندانک جاہ ءَ بلوچ یکجھتی کمیٹی ءِ سروک سبگت اللہ شاہ جی ءَتران کرتگ ءُ گوشتگ کہ مرچی زھرشانی نندانک جاہ ءَ کھول ءُ دمگی واکدار، کمک دمگدار اسماھیل ابراھیم، اے ڈی سی، ڈی او ءُ آدگہ مردمانی میان ءَ گپ ءُ تران بوتگ کہ کمک دمگدار ءَ نبشتھی دروشم ءَ کول کرتگ ءُ یک جی آئی ٹی یے جوڑ کرتگ ، ایشی تہ ءَ درسیں سرکاری ادارہ ھوار بنت ءُ دہ روچانی میان ءَ نندانک جاہ ءَ نشتگیں ھشت زور بیگواھیں مردمانی کھولاں جوانیں ھالے دیگ بیت۔
آئی ءَ گوشتگ کہ ھمے کول ءِ پارست ءَ چہ مرچی ءَ داں دہ روچ ءَ کھول زھرشانی نندانک ءَ ھلاس کن اَنت ءُ تربت ءَ ساڑی بنت۔ ھمے اوست ءَ دار ایں کہ واکدار وتی کول ءَ پیلو کنت ءُ کھولاں ھمے دہ روچانی میان ءَ شریں ھالے دنت ءُ دلجم کنت۔
آئی ءَدیمتر ءَ گوشتگ کہ چہ باندا سرکاری جی آئی ٹی کار بندات کنت ءُ باندا بنداتی دیوان بیت، اے جی آئی ٹی ءَ کھول ءِ نیمگ ءَ بلوچ یکجھتی کمیٹی ءِ سروک سبگت اللہ شاہ جی، تربت سول سوسائٹی ءِ سروک گلزار دوست، زور بیگواھیں مسلم آرپ ءِپت آرپ گلام، زور بیگواھیں جھانزیب ءِ پت پزل کریم، بیگواھیں جان مھمد ءِ زھگ میران جان مھمد، بگواھیں پتہ میار ءِ پت میار، بی ایس او پجار ءِ یاسر بیبگر، مھاز ءُ ناکو کریم ھوار بنت۔
