ٹیکنالونی شرکت گوگل ءَ پہ زبانانی دیمروئی ءَ وتی گوگل ٹرانسلیٹر ءَ دگہ سد ءُ دہ نوکیں زبان ءِ گیش کنگ ءِ جار جتگ۔
شرکت ءَ پنچ شمبے ءِ روچ ءَ وتی یک پوسٹے ءَ نوکیں زبانانی گیش کنگ ءِ جار جتگ ءُ نبشتگ کہ گوگل ٹرانسلیٹر زبانانی اڑانداں پروش ایت دانکہ مردم وتی کش ءُ گور ءُ جھان ءَ ھمگرنچ بہ بیت ءُ شریں وڑے ءَ سرپد بوگ ءَ کمک بہ رس ایت۔ گوگل ءَ ھما زبان کہ گیش کرتگ اَنت آیانی تہ ءَ پنجاپی ( شاہ مکی) بلوچی، دری، اپار، کینٹوینز ءُ دگہ زبان ھوار اَنت۔
پنجاپی ( شاہ مکی ) زبان ءِ باروا گوگل ءِ گوشگ اِنت کہ اے پارسی، اربی سیاھگ ءَ نبیسگ بوتگیں بنجاپی ءِ یک بھرگے ءُ اے پاکستان ءَ درساں گیش گپ کنگ بیت۔
شرکت ءِگوشگ اِنت کہ ھوار کرتگیں زباناں 61 کروڑ 40 لک ءَ گیش مردم گہ جن اَنت یا جھان ءِ کم چہ کم ھشت درسد آبادی ءِ جھگیری ءَ کن اَنت۔
گوگل ءَ گوشتگ کہ اے زبان جتائیں وھداں کارمرز بنت ءُ لھتیں انچیں زبان ھست کہ آیانی گپ جنوک کروڑانی کچ ءَ اَنت۔ لھتیں انچیں زبان ھست کہ آ ھلاس بوگ ءَ اَنت، بلے لھتں مردم پہ آیانی پھریزگ ءَ کار کنگ ءَ اَنت۔
گوگل ءِ رد ءَ گوگل ٹرانسلیٹر ءَ 110زبانانی گیش کنگ آر ٹیپیشل انٹیلی جنس ( اے آئی ) ءِ پارست ءَ ھزار زبانانی کمک کنگ ءِ گامگیج ءِ بھر اِنت کہ آیانی جار 2022 جنگ بوتگ۔
شرکت ءِ گوشگ اِنت کہ ما پہ زبانانی گیش کنگ ءَ اے آئی ءَ کارمرز کنگ ءَ ایں ءُ مئے ‘PaLM 2لینگویج ماڈل برورد اِنت کہ ما گوگل ٹرانسلیٹ ءَ 110 زبان ھوار کرتگ۔ نوکیں زبان لھتیں روچاں گوگل ٹرانسلیٹ ءِ ویب ورژن ءُ ایپ ءَ ھم دست کپ اَنت۔ شرکت ءَ 2022 ءَ زیرو شاٹ مشین ٹرانسلیشن ماڈل ءِ پارست ءَ 24 زبان گیش کرتگ کہ آیاں سے کروڑ ءَگیش مردم گپ جن اَنت۔
گوگل ءِ انوگیں 110 زبانانی گیش کنگ ءَ پد نوں گوگل ٹرانسلیٹر ءَ چہ سرجمیں جھان ءَ 243 زبانی کمک رستگ۔
