نوشکے/ ھب چوکی/ کیچ / ھاران: جتائیں روچاں دہ مردم آوار جنگ ءُ بیگواہ کنگ بوتگ اَنت۔
اھوالکار ءِ رد ءَ چہ نوشکے ءَ زور بیگواہ کنگ بوتگیں ورنایانی نام زیا الرھمان ء بدل ھان، شھیب ء مولوی آلم، ابیدء تاؤس ھان، اُمیر ء ھاپز اُمر، اسمان ء ازیم ھان ءُ ھالد زاھد ھان اِنت۔ اے ورنا نوشکے زیارت ءَ پکنک ءَ شتگ اَنت بیگواہ کنگ بوتگ اِنت۔
چہ ایشاں ھالد ءُ امیر نودربر اَنت،ابید ءُ زیاالرھمان مزن ھور ءَ مزوری ءَ بوتگ اَنت، اسمان گیراج ءُ شھیب شرکتے ءَ کار ءَ بوتگ۔ زیاالرھمان چہ ایشی پیش ھم پاکستانی لشکر ءُ چیریں ادارھانی دست ءَ زور بیگواہ کنگ ءُ رند ءَ یل بوتگ۔
بنشون ءِ رد ءَ چہ ھب چوکی ءَ بیگوہ کنگ بوتگیں ورنا ءِ نام شھداد ء اسماھیل اِنت کہ امیر آباد ءِ جاہ منند اِنت ، شھداد ءَ 9 پروری 2024 ءَ پاکستانی لشکر ءُ چیریں ادارھانی کارمنداں آوار جتگ ءُ بیگواہ کرتگ کہ انگت بیگواہ اِنت۔
ھمے وڑ ءَ چہ کیچ ءَ زور بیگواھیں ورنا ءِ نام ولید ء یوسپ اِنت کہ تربت شاہ آباد آسکانی جاہ اِنت۔ دوشی شپ ءِ سے ءَ پاکستانی لشکر ءُ چیریں ادارھانی کارمنداں آوار جتگ ءُ بیگواہ کرتگ۔
ولید ءِ کھول ءَ آئی بیگواھی ءِ گپ راست کرتگ ءُ ھمے لوٹ کرتگ کہ اگاں مئے زھگ ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔
ھاران ءَ پاکستانی لشکر ءُ چیریں ادارھانی کارمنداں بیڑ برتگ ءُ دو مردم آوار جنگ ءَ پد بیگواہ کرتگ اَنت۔ بیگواھیں مردمانی نام بلال ء داد مھمد ءُ ھالد ء لال مھمد اِنت کہ زورگریں پاکستانی لشکر ءُ چیریں ادارھانی کارمنداں 26 جون ءِ شپ ءَ شاھو گیڑ ءِ نزیک ءَ کلی ءَ بیڑ برتگ ءُ آوار جتگ اَنت۔ بلال ءُ ھالد یکیں کھول ءِ مردم اَنت۔
