تربت: پاکستانی لشکر ءِ دست ءَ زور بیگواہ کنگ بوتگیں مردما نی کھولانی زھرشانی نندانک چہ شھید پدا اھمد چاراہ ءَ روانک ءِ دروشم ءَ کیچ دمگدار ءِ کارگس ءِ دیم ءَ شتگ۔ زھرشانی روانک ءَ بلوچ یکجھتی کمیٹی، سیول سوسائٹی ءُ بی ایس او پجار ءِ سروکاں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔
زھرشانی روانک ءَ ھواریں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت کہ آیاں زوریں بیگواھیانی بگیری ءَ اوگام جتگ ءُ بیگواھیں مردمانی یل کنگ ءِ لوٹ کرتگ۔ سرکار ءِ نیمگ ءَ پہ روانک ءِ دارگ ءَ جتائیں اڑاند ودی کنگ ءَ پد کیچ دمگدار ءِ کارگس ءِ دیم ءَ سر بوگ ءَ سوبین بوتگ۔
یات بہ بہ اِت کہ زور بیگواھیں مردمانی کھولانی زھرشانی نندانک ءَ شھید پدا اھمد چاراہ ءَ چار روچ سرجم بوتگ بلے چہ سرکار ءِ نیمگ ءَ پہ آیانی لوٹانی منگ ءَ ھچ وڑیں گامگیج زورگ نہ بوتگ۔
