کیچ؛ تر بت ءَ دگ ویلے ءَ پاکستانی لشکر ءِ دست ءَ زور بیگواہ کنگ بوتگیں ورنا نسرم ءِ برات ءُ برازتک بیران بوتگ اَنت۔
اھوالکار ءِ رد ءَ ابدالھمید ء پیربکش بلیدہ ءِ میتگ میناز ءِ جاہ منند اِنت آ گوں وتی زھگ ءَ پرپٹ ءِ سر ءَ دیم پہ بلیدہ ءَ روگ ءَ بوتگ اَنت کہ بلیدہ ءِ دوراھی ءَ گاڑی یے ءَ لگت داتگ اَنت پت ءُ چک بیران بوتگ اَنت۔
ابدالھمید ءِ برات نسرم ء پیربکش ءَ زورگریں پاکستانی لشکر ءَ 12 اکتوبر 2023 ءَ آوار جتگ ءُ بیگواہ کرتگ کہ انگت بیگواہ اِنت۔
یات بہ بہ اِت کہ گوستگیں روچاں تربت ءَ دمگدار ءِ کارگس ءِ دیم ءَ برجاھیں زھرشانی نندانک ءَ ابدالھمید پہ وتی برات نسرم ءِ آجوئی ءَ گوں بوتگ۔ چہ واکدار ءِ دروگیں دلبڈی ءَ زھرشانی نندانک ءِ ھلاس بوگ ءَ پد بیگواھیں مردمانی کھول انگت ءَ تربت ءَ ساڑی اَنت کہ آیاں زی دیوانے کرتگ ءُ پد ءَ زھرشانی نندانک ءِ سوڑگ کرتگ۔
