شال: پہ زوربیگواھیں مردمانی پدجنگ ءَ شدکشیں زھرشانی گدان ءَ 5473 روچ سرجم بوتگ۔ شمبے ءِروچ ءَ بی ایس او ءِ پیشیگیں سرکماش سنیٹر مھیم ھانءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ زورگریں ریاست ءِ نیمگ ءَ زوراکیانی درچ برجاہ اِنت۔ سیاسی کارکن ءُ ورنایانی درکانودی زوریں بیگواہ کنگ، آیانی ژانگولیں لاشانی چگل دیگ مردمی ھکانی لگتمالی دودے جوڑ بوتگ۔ بلوچ چکچینی ءُ مردمی ھکانی لگتمالی ءِ باروا ریاست ءِ بگیری ءَ کاروائی کنگ ءَ ابید جتائیں ڈیھ ءُ میان استمانی تک آئی کمک کنگ ءَ اَنت اے سکا بژنی گپے۔
آئی ءَ گوشتگ کہ ایشی یک منانکے چین اِنت بلوچستان ءِ تہ ءَ آئی واھشت گیش بوان اَنت ءُ بے راھبند یں زوریں بیگواھیانی درچ یکشل ءَ برجاہ اِنت۔ مرچی ھپتاد ھزار بلوچ پسگ ریاست ءِ چیریں آزاراجاھاں بندیگ اِنت ءُ گوں مرگ ءَ دیم پہ دیم اِنت، چنچو مردمانی ژانگولیں لاش چگل دیگ بوتگ اَنت۔ بلوچستان ءَ ریاست ءِ زوراکیانی سوب ءَ لکانی کچ ءَ مردما ں لڈ ءُ بار کرتگ۔ پاکستانی چیریں ادارھانی کارمند اود ءَ رندگیری کنگ ءُ مردماں زوربیگوہ کنگ ءَ اِنت۔
ماما کدیر گوشتگ کہ وی بی ایم پی ءَ زوریں بیگواھیانی بگیری ءَ توار چست کرتگ ءُ میان استمانی ادارھانی دلگوش گور کرتگ کہ آ بلوچستان ءَ درکانودی زوریں بیگواھی ءُ ریاستی رزوراکیانی بگیریءَ گامگیج بزور اَنت ءُ گوں بلوچاں انساپ کنگ ءَ وتی کرد ءَ پیلو بہ کن اَنت۔ بلے گوں بژن ءَ گوشگ کپ ایت کہ اکوام متھدہ ءُ میان استمانی ادارہ اے باروا سرجم ءَ بے توار اَنت۔ ما یک رندے پد ءَ گوں اکوام متھدہ ءَ لوٹ کن ایں کہ بلوچستان ءَ مردم ھکانی لگتمالی ءِ بگیری ءَ گامگیج بزور ایت۔
