تربت: چہ بلیدہ ءَ پاکستانی لشکر ءِ دست ءَ زوربیگواہ کنگ بوتگیں مردمانی کھولانی کیچ دمگدار ءِ کارگس ءِ دیم ءَ برجاھیں زھرشانی نندا نک ءَ پنچمی روچ ءَ کھول ءُ واکدار ءِ میان ءَ گپ ءُ تران سوبین بوتگ، کھولاں وتی زھرشانی نندانک ھلاس کرتگ۔
زھرشانی نندانک ءَ کمک دمگدار ءَ چہ زور بیگواھیں مردمانی کھولاں سے روچ ءِ وھد لوٹ اتگ کہ شمئے زھگ یل کنگ بنت یا دیم ءَ آرگ بنت۔ کھول چہ آئی ءِ گپ ءَ رازیگ بوتگ اَنت ءُ زھرشانی اِش ھلاس کرتگ۔
اے باروا کھولانی گوشگ اِنت کہ ما انوں چہ دمگدار ءِ کارگس ءِ دیم ءَ پاد کائیں بلےبلیدہ ءَ نہ رو ایں، اگاں داں سے روچ ءَ گامگیج زورگ نہ بوت ما دوبر دمگدارءِ کارگس ءِ دیم ءَ زھرشانی ءَ نند ایں۔
یات بہ بہ اِت کہ زوربیگواھیں مردمانی کھول 2 جون ءَ چہ بلیدہ ءَ تربت ءَ آتکگ اَنت مرچی پنچ روچ اِنت کہ دمگدار ءِ کارگس ءِ دیم ءَ زھرشانی ءَ نشتگ اَنت۔ اے وھد ءَ دوازدہ زور بیگواھیں مردمانی کھول زھرشانی ءَ نندوک بوتگ اَنت۔
