شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5470روچ سرجم بوتگ۔ چارشمبے ءِ روچ ءَ بی ایس او ءِ کمک سرکماش شیرباز، رسانکدری کارگشاد سھیل، بنجاھی پتر ءِ باسک اسمان ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر تران کرتگ ءُ گوشتگ کہ بلوچستان ءِ جیڑہ ءِ گیش ءُ گیوار گوں راجی زرمبشت ءِ دیم ءَ برگ ءَ بندوک اِنت ءُ بلوچ پسگاں وتی ساہ ءُ سرانی دیمونی داتگ۔ پہ بلوچستان ءِ زرمبشت ءَ بلوچ مات ءُ گھاراں وتی جگرانی ٹکٹر پہ وتن ءَ ندر کرتگ اَنت۔ بلوچستان ءِ تہ ءَ بلوچ ورنا، پیر ءُ کماش، جنین ءُ زھگ ھمک بھرگاں سیادی داروکیں مردم تن ءُ شد، زنداناں آزار اوپار کنگ ءَ اَنت۔
آئی ءَ گوشتگ کہ بلوچستان ءِ راجی جنز تیز بہ بیت چی ءَ کہ بلوچستان ءِ جیڑہ ءِ یکیں راہ بلوچ سرڈگار ءُ دودمان ءِ پھریزگ اِنت۔ نوک آبادکاری نزام گوں زورگری نزام ءَ ھمگرنچ اِنت چہ ایشی سرڈگار ءِ واھند وشھال بوت نہ کن اَنت۔
