بلوچ نودربرگل آزاد ( بی ایس او آازاد ) ءَ ماں چاگردی رسانکدر ایکس ءَ ھشت جون ءِ درگت ءَ نبشتگ کہ ھشت جون ءِ دارگ ءِ بنداتی سوب ھما بلوچ ورنا، پیر ءُ کماشاں دروت ندر کنگ اِنت کہ مرچی بلوچ بوگ ءِ بنیاد ءَ تھاریں زنداناں بندیگ اَنت۔
آئی ءَ گوشتگ کہ اے ھما سنگتانی یات کنگ ءِ روچ اِنت کہ پہ مئے رژنائیں بانداتے ءِ شوھاز ءَ آیانی جند مرچی تھاریں زندانانی باھوٹ اَنت۔ اے روچ ءَ ما گار ءُ بیگواھیں مردمانی کھولاں اے سکین دئیں کہ اے جُھد ءِ تہ ءَ شُما تھنا نہ اِت سرجمیں راج گوں شُما ھمتوار اِنت۔
آئی ءَ گوشتگ کہ اے روچ ءَ ھما دراھیں بلوچ پیر ءُ ورنا ءُ کماشانی یاد کنگ اِنت کہ آیاں استانی زوراکی زندان ءِ تہ ءَ دیستگ، اوپار کرتگ ءُ وتی راجی شھزانتی یل نہ کرتگ۔
