بلوچ اسٹوڈنٹس ایکشن کمیٹی ملیر ھنکین ءِ نیمگ ءَ چہ بلوچ لٹریسی کیمپین ءِ درگت ءَ دیوانے ماں کاٹھور ملیر ءَ برجم دارگ بوتگ۔ اے مراگش جتاجتائیں بھرانی تہ ءَ بوتگ۔
مراگش ءِ گچینی مھمان بلوچ اسٹوڈنٹس ایکشن کمیٹی ءِ بنجاھی رسانکدری کارگشاد اُزیر ءُ گل ءِ بُنجاھی پتّر ءِ باسک سنگت سلیم بوتگ اَنت۔
مراگش ءَبلوچ لٹریسی کیمپن ءِ پریزٹیشن، پینل ڈسکشن، کسمانک، گُشتانک، پبلک انٹریکشن، کتاب مراگہ ءُ سرپدی روانک ءُ جتائیں بھر ھوار بوتگ اَنت۔
مراگش ءِ بنداتی بھر بلوچ لٹریسی کیمپین ءِ پریزنٹیشن بوتگ کہ بساک ملیر ھنکین ءِ اتاشاد بنزہ کارمستر سنگت زرگل بلوچ ءَ پریزنٹیشن داتگ۔
چہ اشی چہ پد جنینانی وانگ ءِ سرھال ءِ سرا بانک مھلب ءَ تران کُرتگ۔
مراگش ءِ دوھمی بھر پینل ڈسکشن بوتگ کہ اِشی مھماندار بساک ملیر ھنکین ءِ کارمستر سنگت شاہ تاج بوتگ ءُ پینلسٹ سراج احمد میتگ کاٹھوروانگجاہ ءِ استاد واجہ ھارون ءُ بساک ءِ بنجاھی پتّر ءِ باسک سنگت سلیم بوتگ اَنت۔ پینلسٹاں ” یک وانگی چاگردے ءِ جوڈشت ءِ تہ ءَ ورنایانی کرد” ءِ سرھال ءِ سرا وتی گپ ءُ تران دیوان ءِ دیم ءَ ایر کُرتگ اَنت۔
مراگش ءِ سیمی بھر کسمانک بوتگ اِشی مول ءُ مراد ماں کاٹھور ملیر ءِ تہ ءَ جنینانی وانگی جیڑھاں ھوار ورنایانی نشہ ءِ آماچ بوھگ ءِ جیڑہ ھوار بوتگءُ سراج ءِ ٹیم سُر سنگر ازمی مجلس ءِ سنگتاں کسمانک پیشداشتگ۔
مراگش ءِ چارُمی بھر گُشتانک بوتگ کہ اے بھر ءِ تہ ءَ ھپیز ءُ بساک ءِ بنجاھی رسانکدری کارگشاد سنگت اُزیر ءَ گُشتانک داتگ۔
مراگش ءِ پنچُمی بھر پبلک انٹریکشن ءُ ششُمی بھر کتاب مراگہ ھوار بوتگ اَنت ءُ مراگش ءِ گُڈّی بھر سرپدی روانک ھوار اَت۔
اے مراگش ءَ تہ ءَ ورنا ءُ نودربراں، استاد ءُ جنیاں ھوار میتگ ءِ آ دگہ مردماں مزنیں کچے ءَ بھر زرتگ۔
