گوادر: زوریں بیگواھیانی بگیری ءَ بلوچ یکجھتی کمیٹی ءِ نیمگ ءَ گوادر پریس کلب ءِ دیم ءَ زھرشانی کنگ بوتگ۔ زھرشانی ءَ زور بیگواھیں مردمانی کھول، سیاسی ءُ چاگردی کارکناں ھوار مردمازں بازیں کچے ءَ بھر زرتگ۔
زھرشانی کنوکیں مردماں تران کرتگ ءُ گوشتگ کہ ریاست ءِ نیمگ ءَ زوریں بیگواھیانی درچ یکشل ءَ برجاہ اِنت۔ بلوچ ورنا ھمک روچ چہ بلوچستان ءِ جتائیں ھند ءُ دمگاں آوار جنگ ءُ بیگواہ کنگ بوگ ءَ اَنت۔ زور بیگواھیں مردمانی کھولانی نیمگ ءَ زھرشانیانی درچ برجاہ اِنت۔
آیاں گوشتگ کہ زور بیگواھیں مردمانی کھول چہ ریاست ءَ کینگدار اَنت چی پمیشکا کہ سیاسی باسک چہ دہ پانزہ سالاں درکانوی بیگواہ اَنت۔ انگت ءَ آیانی باروا گوشگ نہ بیت کہ آیانی میار چے اِنت؟ انگت ءَ ھمے بھتام ءَ جنگ بیت کہ جنگ ءِپڑا دزگیر کنگ بوتگ اَنت اے تچکی ءَ آئی دروگ اَنت۔ ھما مردم آوار جنگ بوتگ اَنت بلکیں چہ آیاں چاکو ھم دستیگ کنگ نہ بوتگ، گڑا کجام پیم ءَ اے ھبر ءَ گوشتگ کن اَنت کہ اے ناشرکار اَنت۔
زور بیگواھیں ازیم دوست ءِ گھار ءَ تران کرتگ ءُ گوشتگ کہ منی برات 3 جولائی 2015 ءَ چہ گوادر ءَ زور بیگواہ کنگ بوتگ کہ انگت بیگواہ اِنت۔ من پہ وتی برات ءِ شوھازگ ءَ نو سال اِنت ھمے دگانی سر ءَ زھرشانی کنگ ءَ آں۔ من انگت نہ زاناں کہ منی برات ءَ کجام میارباری کرتگ۔
آئی ءَ گوشتگ کہ ما وھدے پہ وتی براتانی درگیجگ ءَ زھرشانی کن ایں گڑا مارا ریاست ھمے گوش ایت شما پہ وتی پیش دارگ ءَ دگانی سر ءَ درکپ اِنت۔ ما چوشیں ریاست ءَ لانت گوش آں کہ یک نیمگے ءَ مئے براتاں بارت ءُ پد ءَ گوش ایت شما وت ءَ پیش دارگ لوٹ اِت۔
