آواران: نوندڑہ ءَ زورگریں پاکستانی لشکر ءِ بنجل ءِ سر ءَ ارش ءِ میان ءَ شھید بوتگیں سرمچار شھید اشرپ پنام ریھان نوکاپ ءِ لاش گلزمین ءِ میار کنگ بوتگ۔
اھوالکار ءِ رد ءَ بی ایل ایپ ءِ سیکنڈ لپٹیننٹ اشرپ پنام ریھان نوکاپ ء مراد بکش ءِ لاش مرچی آواران ءَ گلزمین ءِ میار کنگ بوتگ۔ شھید اشرپ مشکے ءِ میتگ کندڑی ءِ جاہ منند اِنت۔
یات بہ بہ اِت کہ بلوچستان آجوئی سنگر ( بی ایل ایپ ) ءِ کربان بھرگ ءِ سرمچاراں 26 مئی ءِ بیگاہ ءَ نوندڑہ، جاؤ ءَ زورگریں پاکستانی لشکر ءِ بنجل چہ چاریں نیمگاں انگر کرتگ اَت ءُ چہ نزیک ءَ ترندیں ارشے کرتگ کہ ھمے ارش ءِ میان ءَ بی ایل ایپ ءِ سرمچار اشرپ پنام ریھان نوکاپ نیمران بوتگ اَت۔
بی ایل ایپ ءِ جارکش میجر گھرام ءِ رد ءَ داں چار اداراں برجاھیں ارش ءَ زورگریں پاکستانی لشکر ءِ درزنے ءَ گیش کارمند مرتگ ءُ ارش ءِ آسر ءَ پنچ پانگس ءُ بنجل ءِ درسیں سنگر تباہ بوتگ اَنت۔
