آواران: چہ اورماڑہ ءَ پاکستانی پوج ءِ دست ءَ بیگواہ کنگ بیتگیں سگیر اھمد ءِ گھار نسیدہ بلوچ ءَ وتی شنگ کرتگیں تامربندے ءَ گوشتگ کہ منی برات سگیر اھمد ءُ ناکو زتک اکرار بلوچ چہ اورماڑہ ءَ بیگواہ کنگ بیتگ اَنت انگت ءَ آیانی ھچ وڑیں ھال نیست۔
آئی ءَ گوشتگ کہ یکیں کھول ءِ دو مردمانی زوریں بیگواھی زوراکیانی گڈی ھداِنت ءُ مئے سرجمیں کھول گوں ھمے رنجاں گوزگ ءَ اِنت۔ ایشی درد ءَ ھما مردم زانت کنت کہ آ ھمے دردءِ آماچ بیتگ۔
نسیدہ بلوچ ءَ گوں درسیں انسانی ھکانی ھندی ءُ میان استمانی گل، سیاسی ءُ چاگردی بھرگ ءُ گوں نودربراں لوٹ کرتگ کہ آ پہ سگیر اھمد ءُ اکرار ءِ زوتیں آجوئی ءَ توار چست بہ کن اَنت۔
آئی ءَ گوشتگ کہ سگیر اھمد منی گھار ھمیدہ بلوچ ءِ زھگانی والینوک بیتگ۔
