آواران: نوندڑہ ءَ سلاہ بندیں مردمانی ارش ءَ پد زورگریں پاکستانی لشکر ءِ لشکرکشی برجاہ اِنت۔
اھوالکار ءِ رد ءَ زی بیگاہ ءَ نوندڑہ ءِ میتگ ءَ ڈل ءِ شھر ءَ زورگریں پاکستانی لشکر ءِ بنجل ءِ سر ءَ سلاہ بندیں مردمانی ترندیں ارش ءَ پد مرچی زورگریں لشکر بازیں کچے ءَ مچ بوتگ اَنت ءُ جتا جتائیں میتگاں لشکرکشی کنگ ءَ اَنت۔ لشکر ءَ مرچی ڈل ءِ شھر ءُ بُٹیاں ھوار جتاجتائیں میتگاں بیڑ برتگ ءُ گوں مردماں زوراکی کرتگ۔
ھندی بنشونے ءِ رد ءَ مرچی زورگریں پاکستانی لشکر ءَ نوندڑہ ءِ دگ ءَ رھگوز داشتگ ءُ روگ ءَ نہ اشتگ اِنت ۔ میتگانی مردم ھم وتی ڈگارانی نیمگ ءَ روگ ءَ داشتگ اَنت۔ زی ادارے ءَ گیش سلاہ بندانی ارش ءِ میان ءَ لشکری کارمندانی مرگ ءَ ابید بازیں کارمندانی تچگ ءُ بیگواھی ءِ ھال اِنت۔
زی بیگاہ ءِ ارش ءَ پد پاکستانی لشکر ءِ جنگی بالگرد بنجل ءَ آتکگ ءُ نشتگ، دوشی داں دیر ءَ بنجل ءِ کر ءُ کشاں گیس جتگ ءُ تیرگواری کرتگ۔
انگت ءَ دگہ آوارجنی ءِ ھال نیست اے باروا مئے گیشیں جست ءُ پرس برجاہ اِنت۔
