آواران: پاکستانی لشکر ءِ دست ءَ زور بیگواہ کنگ بوتگیں بلوچ نودربر سروک شبیر ءِ گھار سیما وتی تامربندے ءَ گوشتگ کہ 4 اکتوبر 2024 منی برات شبیر ءِ پاکستانی چیریں آزار جاھاں بندیگ بوگ ءَ ھشت سال سرجم بیت۔ ھشت سال گوشگ ءَ سک ارزان اِنت، بلے ایشانی گوازینگ سکا جنجال اِنت۔
آئی ءَ گوشتگ کہ بلوچ راج ءِ تہ ءَ نہ تیوک ءَ شبیر اِنت کہ آوار جنگ بوتگ، بلکیں ھزارانی کچ ءَ شبیر آ ھمک روچ ءِ بنیاد ءَ آوار جنگ بنت۔ پاکستانی لشکری ادارہ مردماں آوار جنگ ءُ بیگواہ کنگ بوگ ءَ اِنت۔ ھدا بزانت کہ کج ءَ اَنت۔ گیشتریں مردمانی لاش دزکپ اَنت یا نیمرگ ءِ جاوراں یل کنگ بنت۔
سیما ءَ گوشتگ کہ منی پیریں مات، شبیر ءِ نیم جنوزامیں لوگبانک ءُ ما درس پہ آئی آجوئی ءَ ھر وڑیں جھد کنگ ءَ ایں۔ گوں پاکستانی سرکار ءَ ھمے لوٹ ءَ کن ایں کہ شبیر ءَ ھوار چونیں ھم بیگواھیں مردمے ءَ چونیں میارے کرتگ گڑا آیاں آمیدگس ءَ پیش بہ کن اَنت۔ بلے اے وڑ ءَ کھولاں سزا مہ دے اِت۔
آئی ءَ گوشتگ کہ پہ شبیر ءِ آجوئی ءَ 4 اکتوبر ءَ ایکس ءَ کمپینے برجم دار ایں، گوں درسیں مردماں لوٹ کن ایں کہ کمپین ءَ بھر بزور اَنت ءُ شبیر ءَ ھوار پاکستانی لشکر ءِ دست ءَ پہ زور بیگواہ کنگ بوتگیں مردماں توار چست بہ کن اَنت۔ اے کمپیں نیمروچ ءِ دو ءَ داں شپ ءِ دوازدہ ءَ برجاہ بیت۔
