آواران: مشکے ءِ جاہ منند زوربیگواھیں چنگیز ءِ گھار ھپزہ ءَ وتی تامربندے ءَ گوشتگ کہ منی برات 11 جنوری 2014 ءَ چہ ھزدار ءَ زور بیگواہ کنگ بوتگ۔ دہ سال ءِ گوزگ ءَ پد ھم انگت ءَ بیگواہ اِنت۔ دہ سال پہ گوشگ ءَ دو لبز اِنت بلے اے دہ سال ءَ ما چنچو جنجال بوتگ ایں اے گپ کنگ نہ بیت۔
آئی ءَ دیمتر ءَ گوشتگ کہ یک مردمے ءِ زوریں بیگواھی تیوگیں کھول ءَ سکا جنجال کنت۔ من ءُ منی کھول گوں کجام درداں گوستگ ایں اے بلوچستان ءِ ھمک گس ءِ کسہ اِنت۔
ھپزہ ءَ گوشتگ کہ ھزدار ءِ جاہ منند آسپ ، رشید ءُ سلمان ءِ کھول ھمے جنجالانی دیمپان اَنت۔ 31 اگست 2018 ءَ رشید ءُ آسپ چہ نوشکے ءَ زور بیگواہ کنگ بوتگ اَنت آیانی گھار سائرہ چون منی وڑ ءَ اکس زرتگ ءُ وت اکسے جوڑ بوتگ۔ ھمے وڑ ءَ سادیہ ءِ برات 13 نومبر 2022 ءَ چہ شال ءَ زور بیگواہ کنگ بوتگ، آ ھم وتی برات ءَ پٹ ءُ پول کنگ ءَ اِنت۔
آئی ءَ گوشتگ کہ پہ زور بیگواھیں مردمانی پٹگ ءَ مارا کمک بہ کن اِت ءُ وائس پارجسٹس ءِ نیمگ ءَ 24 مئی ءَ بیگاہ ءِ ھپت ءَ داں داوزدہ ءَ ایکس ءَرشید، آسپ ءُ سلمان ءِآجوئی ءَ کمپین ءِ بھر بہ بہ اِت وتی مردمی ءُ دودمانی ھک ءَ پیلو بہ کن اِت۔
