شال : پہ زور بیگواھیں مردمانی پدجنگ ءَ شدکشیں زھرشانی گدان ءَ 5447 روچ سرجم بوتگ۔سے شمبے ءِ روچ ءَ چہ تربت ءُ پنجگور ءَ سیاسی ءُ چاگردی کارکن کامریڈ شھزاد، زبیر ءُ بی ایس او پجار ءِ نئیم ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ دژمن چنچو بلوچ شھید بہ کنت بلے گوستانک درساں پدر کنت، دژمنءِ اے وڑیں زوراکی پہ زرمبشت ءَ جوانیں کارے۔ ھمک جھدکار یں ھمبلءِ شھیدی ھزارانی کچ ءَ بلوچاں جوزگ بکشائیت ءُ سلاہ بند بنتءُ پہ سرڈگار ءُ راج ءَ مرگ ءَ چڑکہ بنت۔
آئی گوشتگ کہ شھیدانی کاروان ءَ جنزاں کنت، آیانی یاد مدام توکل ءُ ھاٹیگ بکش اَنت۔ اے میان ءَ نہ ترس گوں نیک نیتی ءَ لیکھی ھمبلانی پہ واھشتانی پیلو کنگ ءَ وتی زاتی واھشت اِش کشتگ اَنت، چہ کینگداری ءَ پھک اَنت ءُ وتی کاروان ءَ دیم ءَ برگ ءَ اَنت۔ پہ دژمن ءِ زوراکیا نی پسو دیگ ءَ یکجاہ ءُ مھکم بوگی اِنت، وتی چاگرد ءِ تہ ءَ نشان کنگ ءُ جست گرگی اِنت۔ ھما کہ دژمن ءِ ھک ءُ زرمبشت ءِ بگیری ءَ گپ کن اَنت ءُ مردمانی چہ راجی زرمبشت ءَ بے اوست کنگ ءِ جھد ءَ کن اَنت۔
ماماکدیر گوشتگ کہ بلوچ راج ءِ اوست ھمیش اِنت کہ اکوام متھدہ، نیٹولشکر ءُ آدگہ میان استمانی توانمند بلوچستان ءِ باروا دزمانجنی بہ کن اَنت ءُ پہ بلوچ ءِ جیڑہ ءِ گیش ءُ گیوار کنگ ءَ وتی کرد ءَ پیلو بہ کن اَنت۔ بلوچ چکچینی، زور بیگواھیں مردمانی کشت ءُ کوش ءِ باروا زوت دلگوش ءَ گور بہ کن اَنت۔
