ھزدار: زور بیگواھیں ھاپز تیب ءِ کھول ءِ نیمگ ءَ پہ آئی یل نہ کنگ ءِ بگیری ءَ زھرشانی روانکے کشگ بوتگ۔ بلوچ یکجھتی کمیٹی ءَ زھرشانی رونک ءِ پلہ مرزی کرتگ ءُ آدگہ زور بیگواھیں مردمانی کھولاں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔
زھرشانی ءَ ھواریں مردماں زور بیگواھیں مردمانی اکس گوں بوتگ اَنت ءُ آیانی زوریں بیگواھی ءِ بگیری ءُ پہ درسیں بیگواھیں مردمانی آجوئی ءَ اوگام جتگ۔
زھرشانیءَ تران کنان ءَ کھول ءَگوشتگ کہ ھاپز تیب ءَ 4 مئی 2013 ءَ چہ جھالاوان نادراھجاہ ھزدار ءَ پاکستانی لشکر ءَآوار جتگ ءُ بیگواہ کرتگ، آئی زوریں بیگواھی ءَ یازدہ سال سرجم بوتگ کہ انگت ءَ آئی ھچ وڑیں ھال نیست۔
کھولءَ لوٹ کرتگ ءُ گوشتگ کہ اگاں آئی سر ءَ چونیں بھتامے ھست گڑا آمیدگس ءَ پیش کنگ بہ بیت۔ اگاں بےمیار اِنت گڑا زوتاں چہ زوت یل کنگ بہ بیت۔
زھرشانی ءَ آدگہ مردماں تران کرتگ ءُ گوشتگ کہ تیوک ءَ ھزدار ءَ چہ سالاں ورنا زور بیگواہ کنگ بوگ ءَ اَنت۔ اے میان ءَ درزنانی کچ ءَ ورنا آوار جنگ ءَ پد بیگواہ کنگ بوتگ اَنت۔ زور بیگواھیں مردمانی کھول پہ وتی آزیزانی آجوئی ءَ بلوچستان ءَ ھوار داں اسلام آبادءَ زھرشانی ءَ شتگ اَنت۔ آیاں گوں میان استمانی مردمی ھکانی ادارھاں لوٹ کرتگ ءُ گوشتگ کہ بلوچستان ءَ برجاھیں زوریں بیگواھیانی دارگ ءَ وتی کرد ءَ پیلو بہ کنت ءُ پہ درسیں بیگواھیں مردمانی آجوئی ءَ گامگیج بزور ایت ءُ اے زوراکیانی پژدر ءَ ریاست ءَ جُست بہ کنت۔
