بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں کیچ ءِ بنجاھی شھر تربت ءُ تمپ ءَ دژمنیں لشکر ءِ سر ءَ اُرش کُرتگ ءُ سَے کارمند مُرتگ ءُ سَے ٹپی بیتگ۔
آئی ءَ گوشتگ کہ سرمچاراں زی 25 اپریل ءَ شپ ءِ نوہ ءُ نیم ءَ کیچ ءِ بنجاھی شھر تربت ءَ تالیمی چاراہ ءَ برجاھیں لشکر ءِ پانگس ءِ سر ءَ دستی بمب اُرشے کُرتگ۔
جارکش ءَ گوشتگ کہ دستی بمب پانگس ءِ تہ ءَ کپتگ کہ چہ ایشی ءَ پانگس ءَ ساڑی ئیں یک کارمندے مُرتگ ءُ یکے ٹپی بیتگ ءُ پانگس ءَ ھم تاوان بیتگ۔
آئی ءَ گوشتگ کہ اُرش ءَ پد پروش وارتگیں لشکر ءَ داں دیر ءَ لس آبادی ءِ سر ءَ تیرگْواری کُرتگ۔
جارکش ءَ گوشتگ کہ دگہ یک اُرشے ءَ دوشی شپ ءِ دہ ءُ نیم ءَ تمپ، ملانٹ ءَ برجاھیں زورگریں پاکستانی لشکر ءِ پانگس ءِ سر ءَ سرمچاراں چہ نزیک ءَ شُتگ ءُ گوں نوک ءُ ٹوھیں سلاھاں اُرش کُرتگ، اُرش انچوش تُرند بیتگ کہ دژمن ءَ وتی گیگ کنگ ءِ موہ نہ رس اِتگ ءُ اُرش ءَ دژمن ءِ دو کارمند مُرتگ ءُ دو ٹپی بیتگ۔
آئی ءَ گوشتگ کہ اُرش ءَ پد زورگریں لشکر ءِ ھمے پانگس ءِ نزیک ءَ برجاھیں لشکر پہ کمک ءَ ھمے پانگس ءَ اتکگ اَنت بلے سرمچار پہ دْراھی وتی سنگرانی نیمگ ءَ سربیگ ءَ سوبین بیتگ اَنت۔
میجر گھرام ءَ اُرشانی زمہ واری منّ اتگ اَنت ءُ گوشتگ کہ داں سرجمیں سرڈگار ءِ آجوئی ءَ دژمنیں لشکر ءِ سر ءَ اُرش گوں تُرندی ءَ برجاہ بنت۔
