بلوچ راجی راھشون ءُ بلوچستان آجوئی سنگر ( بی ایل ایپ ) ءِ سرکماش ڈاکٹر اللہ نزر ءَ پہ بلوچ ءَ راج ءَ وتی کلوھے ماں رسانکدر ءَ شنگ کرتگ۔
آئی گوں راج ءِ درسیں بھرگاں سیادی داروکیں مردماں دلگوش گور کرتگ ءُ گوشتگ کہ مئے جھد گوں سوبمندی ءَ جنزاں اِنت ءُ ما چہ دژمن ءَ باج ءَ بر ایں۔ پہ مئے آبادی ءِ کم کنگ ءَ دژمن ءِ شوربندی بے سوب بوتگ۔
ڈاکٹر اللہ نزر ءَ گوں ڈیھ ءُ درانڈیھ ءِ جھمنندیں بلوچاں دلگوش گور کرتگ ءُ گوشتگ کہ بلوچ آجوئی جھد ءِ بھر بہ بہ اِت۔ بلوچ ءِ بستار ءَ شمے سر ءَ اوست دار آں انچوش کہ شما وتی زھگاں پہ ھمے سیتاں کربان کنگ ءَ اِت شمارا درسان ءَ سرمچارانی مالی کمک کنگ لوٹ ایت۔ شمئے کمک ءَ ابید راجی جنز دیم ءَ روت بلے باز جنجالانی دیمپانی بیت۔
بلوچ راھشون ءَ گوشتگ کہ شما جھان ءَ دلجمی داتگ شمئے گپ گوش دارگ بنت، شما پارلیمنٹ ءِ ماڑیانی دیم ءَ زھرشانی کرتگ ءُ آمیدگساں ھم شتگ ات۔ اے آمیدگس مئے بگیری ءَ کارمرز بوگ ءَ اَنت ءُ لشکر ءِ پلہ مرزی ءَ کنگ ءَ اَنت۔ اسمبلی ءِ باسک کانود سازی کن اَنت گڑا آ پہ پنجاپی ءِ زورگپتی ءِ مھکم کنگ ءَ کانود سازی کنگ ءَ اَنت۔
ڈاکٹر اللہ نزر ءَ گوشتگ کہ ما یکے دومی ءَ شریں وڑے ءَ زان ایں ءُ سرپد ایں کہ کئے پہ کئی کمک ءَ کار ءَ اِنت، پہ کئی پرمان ءِ رد ءَ کار ءَ اِنت۔ یک مردمے چہ 2013 ءَ بگر داں 2016 ءَ بلوچستان ءِ مزن وزیر بیت آ ھمے گپ ءَ کنت کہ لشکر کس ءَ جست نہ کنت۔
بلوچ راھشون ءَ گوشتگ کہ من گوں مردماں ھمے دزبندی ءَ کناں کہ آیانی آمیدگس ءُ اسمبلیانی سر ءَ بیسہ مکن اَنت ءُ نہ آیانی مردم بیسھی مردم اَنت۔ بلوچ راج ءِ گڈی منزل آجوئی اِنت۔ راجے ءِ بستار ءَ اے مئے ایمان اِنت کہ ما وتی زھگاں کربان کن ایں اے جنگ ءَ داں پشت ماں پشت ءَ برجاہ دار ایں۔
ڈاکٹر اللہ نزر ءَ گوں بلوچ ءُ پشتوناں دلگوش گور کرتگ ءُ گوشتگ کہ پاکستان کدی ھم بلوچ ءُ پشتوناں ایمنی ءَ زند گوازینگ ءَ نیل ایت۔ انچوش کہ بلوچ ءُ پشتوناں برتانیہ ءِ زوراکیانی بگیری ءَ گھگیری کرتگ دگہ کس ءَ نہ کرتگ۔ پمیشکا بلوچ ءُ پشتوناں سزا ءَ دیگ ءَ اِنت۔
بلوچ راھشون ءَ گوں سرجمیں راج ءَ یکجاہ بوگ ءِ لوٹ کرتگ ءُ گوشتگ کہ انچوش شما دژمن ءِ ھستمان تاوان داتگ چہ ایشی ءَ سچگ ءَ اِنت، آئی جوڑ کرتگیں مزن وزیر انوار الھک کاکڑ ءَ منّ اتگ کہ اے آجوئی ءِ زرمبشتے۔ آئی منگ ءَ مئے بار ارزان کرتگ کہ ما پہ آجوئی ءَ مڑگ ءَ بوتگ ایں ءُ انگت مڑگ ءَ ایں۔
بی ایل ایپ ءِ سروک ءَ گڈی ءَ درسیں بلوچ شھیدان ءَ دروت ندر کرتگ ءُ گوشتگ کہ راج ءِ ھمک ورنا ءُ کماشاں پہ ھمے سیتاں وتی کرد پیلو کرتگ ءُ کنگ ءَ اَنت۔ آیانی مستریں بھر گوں راجی سیتاں ھمگرنچ اَنت،ابید چہ دو ءُ سے درسد ءَ کہ آیانی تہ ءَ لھتیں ٹیکدار اَنت، سرکاری نوکر اَنت ءُ اسمبلی ءِ باسک دو ءُ سے درسد اَنت۔
ڈاکٹر اللہ نزر ءَ گوشتگ کہ پہ ھمے سیتاں بلوچ ءِ کمک بے مٹ اَنت، نہ تیوک ءَ منی بلکیں ھمک ھما مردم ءِ پلہ مرزی ءَ کنگ ءَ اَنت کہ آجوئی جھد ءَ پرکار اَنت۔ ما دلجمیں کہ ما وتی آجوئی ءِ گرگ ءَ پد ءَ سوبین بہ ایں ءُ چہ شمئے کمک ءَ ما زوت دژمن ءَ باج ءَ بر ایں۔
دلگوش! بلوچ راجی راھشون ڈاکٹر اللہ نزر ءِ کلوہ بلوچی زبان ءَ اِنت۔ سرجم ءَ بیست دمان ءُ پنجاہ کتر اِنت۔ سرجمیں توار بند شمارا بلوچستان آجوئی سنگر ( بی ایل ایپ ) ءِ رسانکدری تندجاہ ” آشوب چینل“ ءِ ھواری ءَ زرمبش ءِ یوٹوب چینل ءَ دست کپ ایت۔
