بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹر دین مھمد ءِ جنک سمی دین ءَ ماں چاگردی رسانکدر ایکس ءَ نندانک ءِ ھلاسی ءِ جار ءِ پژدر ءَ نبشتگ کہ اسلام آباد ءَ ریاستی زوراکیانی بگیری ءَ مئے اے زرمبشت پنچمی دور ءَ سر بوتگ، اود ءَ 27 جنوری ءَ شال ءَ مچی یے برجم دار ایں۔ ما اے میان ءَ اسلام آباد ءَ نشتگین ءُ اسلام آباد ءِ گوں بلوچاں پیش بوتگیں رویشت تیوگیں جھان ءِ دیم ءَ ایر کرتگ۔
آئی ءَ گوشتگ کہ اد ءَ اے زرمبشت ءَ ڈیھ ءِ تہ ءُ میان استمان ءَ پلہ مرزی گون بوتگ، اے درگت ءَ برتانیہ ءِ پارلیمنٹ ءِ کارکن ءَ بگر داں آئرلینڈ ءِ پارلیمنٹ ءِ کارکن ءُ دری کارانی وزیر ءِ نیمگ ءَ بلوچانی گون ءَ ریاستی زوراکیانی بارو ءَ بے پھریزی پیش کرتگ اَنت۔
سمی دین ءَ گوشتگ کہ میان استمان ءِ نامداریں ( environmental activist) گرتا تونبرگ وھد وھد ءِ سر ءَ مئے نندانک ءِ پلہ مرزی ءُ سرجم ءَ کمک ءَ ھم گپ جتگ۔ میان استمانی رسانک ءُ روتاکاں مئے نندانک ءِ رپورٹ کنگ ھم مئے زرمبشت ءِ سوبمندی زانگ بیت۔ اد ءَ بلوچستان ءِ ھال ریاست ءِ نیمگ ءَ رسانکدر ءَ گندگ نہ بوتگ اَنت بلے میان استمان ءَ جتائیں زبانانی تہ ءَ رپورٹ کنگ بوتگ۔
آئی ءَ گوشتگ کہ اسلام آباد ءِ اے شھرانی وکیل، نودربر، گل، رسانکدری، مردمی ھکانی کارکن، اھوالکاریں ھمبلاں مئے کمک اِش کرتگ جتائیں راج آیانی تہ ءَ بلوچ، سندی، پشتون، اردو ھبر کنوکیں پنجاپی، گلگت بلدستان، کشمیری، سرائیکی ءُ ھزارہ مئے نندانک ءَ آتکگ اَنت ءُ مارا پلہ مرزی کنگ ءِ دلجمی اِش داتگ چہ تیوگیں بلوچستان ءِ نیمگ ءَ آیانی منتواراں۔ جھد داں گڈی سوبمندی ءَ۔
