بلوچ یکجھتی کمیٹی ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچ چکچینی ءِ بگیری ءَ برجاھیں زرمبشت ءِ پنچمی بھر ءِ درچ ءَ ائید ءِ روچ ءَ پہ سرجمیں بلوچستان ءَ زھرشانیانی لڑ ءُ ھالاں زوت رسانکدر ءَ شنگ کن ایں۔ شال ءُ کراچی ءَ زوریں بیگواھیانی بگیری ءَ بیگواھیں بلوچانی توار ( وی بی ایم پی ) ءِ نیمگ ءَ زھرشانیانی پلہ مرزی ءَ کن ایں۔
آئی ءَ گوشتگ کہ بلوچ راج اے وھد ءَ وتی پجار ءِ بنیاد ءَ چکچینی ءِ دیمپانی ءَ کنگ ءَ اِنت۔ ایشی تہ ءَ زوریں بیگواھی، درکانودی کوش، لشکری کاروائی، زوریں لڈینگ، مالی کوش ءُ آدگہ میارباری ھوار اَنت۔ بلوچ یکجھتی کمیٹی ءَ بلوچ چکچینی ءِ بگیری ءَ یک زرمبشتے برجاہ داشتگ اے درگت ءَ ریاست ءِ بنجاھی شھر اسلام آباد ءَ یک دراجکشیں زھرشانی نندانکے ءَ نشتگ ایں، چہ ایشی ءَ ابید ریاست وتی بلوچ چکچینی شوندات ءِ مٹ کنگ ءَ جاڑیگ نہ اِنت ءُ زوریں بیگواھی تیز کنگ بوتگ، زور بیگواھیں مردمانی درکانودی کوش برجاہ اِنت۔ گوستگیں روچاں لیاری ءَ دو بلوچ ورنا درکانودی کشگ بوتگ اَنت۔
جارکش ءَ گوشتگ کہ بلوچ یکجھتی کمیٹی ءِ بلوچ چکچینی ءِ بگیری ءَ زرمبشت ءِ اے وھد ءَ پنچمی بھر برجاہ اِنت۔ ما گوں بلوچاں دزبندی کن ایں کہ بلوچ چکچینی ءِ بگیری ءَ اے زرمبشت ءَ شریں وڑے ءَ بھر بزور اَنت ءُ آئید ءِ روچ ءَ چہ وتی گساں در بہ کپ اَنت ءُ وتی وتی ھنداں بیوکیں زھرشانیاں شریں وڑے ءَ بھر بزور اَنت۔
