کیچ : زورگریں پاکستانی لشکر ءِ جوڑ کرتگیں کشندہ ٹولی ءِ کارمنداں شھید جلال پنام برمش ءِ مانش ءِ بیرک دور کرتگ اَنت۔
اھوالکار ءِ رد ءَ شھید جلال پنام برمش ء ھسن تلمب مند ءِ جاہ منند اِنت، آئی مانش جند ءِ میتگ ءَ اِنت۔ دومی رند اِنت کہ کشندہ ٹولی ءِ کارمند آئی مانش ءِ سر ءَ بیڑ برگ ءُ بیرکاں دور کنگ ءَ اَنت۔
اے رندی بلوچ سرمچاراں بیست ءُ ھشت پروری ءَ شھید جلال ءِ مانش ءِ سر ءَ بلوچستان ءِ بیرک مک کرتگ ءُ ستک شانی ندر کرتگ اَت۔ آئی ءِ مانش ءِ سر ءَ دوشی کشندہ ٹولی ءِ کارمند شتگ اَنت بیرکانی دور کنگ ءِ ھواری ءَ کھول ءِ آدگہ مردمانی کبر ھم کمشرپ کرتگ ءُ پروشتگ اَنت۔
شھید جلال پنام برمبش ءِ شھیدی ءَ پد آئی مانش ءَ بلوچستان ءِ بیرک جنگ بوتگ، اولی رند ءَ پاری ھشت اپریل ءِ شپ ءَ پاکستانی لشکر ءِ جوڑ کرتگیں کشندہ ٹولی ءِ کارمنداں بیرک دور کرتگ اَت۔
یات بہ بہ اِت کہ شھید جلال پنام برمبش بلوچستان آجوئی سنگر ( بی ایل ایپ ) ءِ سرمچارے ءُ پاری 23 پروری ءَ مزنبند ءِ کوہ ءَ زورگریں پاکستانی لشکر ءِ ڈرون اُرش ءَ شھید کماندار میجر مھمد کریم پنام ملا بھرام، شھید ھزا پنام میرل، شھید لپٹینیٹ تالب پنام کمانچر، شھید شھزاد پنام چراگ، شھید آسپ پنام جنید، شھید لپٹینٹ منزور پنام کیا ءُ شھید مولابکش پنام گپار ءِ ھواری ءَ شھید بوتگ۔
