گْوادر: شکانی در ءَ زور بیگواھیں مردمانی کھولانی نیمگ ءَ برجاھیں زھرشانی ءَ پولیس ءَ بیڑ برتگ ءُ جنین ءُ زھگ لٹ شاپ کرتگ اَنت، سے مردم آوار جتگ ءُ گوں وت برتگ۔
زھرشانی کنوکیں مردمانی گوشگ اِنت کہ ما پہ وتی زور بیگواھیں آزیزانی یل نہ کنگ ءِ بگیری ءَ زھرشانی ءَ دگ بند کرتگ ءُ نشتگ ایں پولیس بازیں کچے ءَ گاڑیانی سر ءَ آتکگ کہ آئی ءَ جنین ھم گوں بوتگ، مئے زھرشانی ءِ سر ءَ بیڑ برتگ۔
آیانی گوشگ اِنت کہ پولیس ءَ بیڑ برگ ءِ میان ءَ جنین ءُ زھگ دگ ءِ سر ءَ گراں کرتگ ءُ آیانی سر ءِ گشان چک اتگ اَنت ءُ لٹ شاپ کرتگ اَنت۔ سے ورنا وھاب، ازگر ءُ وھید آوار جتگ ءُ گوں وت برتگ اَنت۔
آیانی گوشگ اِنت کہ پولیس ءِ بیڑ برگ ءِ میان ءَ آیاں کرآن شریپ پولیس کارمندانی دیم ءَ داشتگ کہ پولیس ءَ سی پارہ شھید کرتگ اَنت۔
چاگردی رسانکدر ءَ شنگ بوتگیں تامربندے ءَ گندگ بیت کہ زھرشانی ءَ نشتگیں جنینے پولیس ءِ دست ءَ شھید کرتگیں سی پارھانی ٹکراں پیش دارگ ءَ اَنت۔
