لسبیلہ: ھب چوکی ءَ زورگریں پاکستانی لشکر ءُ چیریں ادارھانی کارمنداں دوشی بیڑ برتگ ءُ ٹیچرے آوار جنگ ءَ پد بیگواہ کرتگ۔
بنشون ءِ رد ءَ زور بیگواھیں مردم ءِ نام بھروز دلاوری اِنت پاکستانی لشکر ءَ دوشی دو ءُ نیم ءَ امیر آباد ھب چوکی ءَ گس ءَ بیڑ برتگ ءُ آوار جتگ۔
زور بیگواھیں بھروز دلاوری ءِ بیگواھی ءِ گپ آئی کھول ءَ راست کرتگ ءُ گوشتگ کہ پاکستانی لشکر ءِ ھواری ءَ سادگ پوشاکیں چیریں ادارھانی کارمند ھم گوں بوتگ اَنت، گوستگیں شپ ءِ دو ءُ نیم ءَ آوار جنگ ءَ پد بھروز دلاوری ءِ ھچ وڑیں ھال نیست۔
یات بہ بہ اِت کہ چہ ایشی ءَ پیش ھم ھب چوکی ءَ پاکستانی لشکر ءُ چیریں ادارھانی کارمندانی دست ءَ جتائیں ھندانی باز مردم زور بیگواہ کنگ بوتگ اَنت۔
چوش کہ چہ بلوچستان ءِ جتائیں ھند ءُ دمگاں پاکستانی لشکر ءِ زوراکیاں بازیں مردماں لڈ ءُ بار کرتگ ءُ ھب ءُ کراچی ءِ جتائیں جاھاں نشتگ اَنت، بلے ھب ءُ کراچی ءَ ھم مردم پاکستانی لشکر ءِ زوراکیانی آماچ بوگ ءَ اَنت۔
