شال: پہ زور بیگواھیں مردمانی پد جنگ ءَ وائس پار بلوچ مسنگ پرسن ( وی بی ایم پی) ءِ زھرشانی گدانءَ 5933 روچ سرجم بیتگ۔ مرچی گل ءِ ایگزیکٹو کمیٹی ءِ باسک نیاز مھمد گدان ءَ ساڑی بیتگ کہ بلوچ اھوالکار نیاز مھمد، زور بیگواھیں جھانزیب مھمد ھسنی ءِ مات ءُ جنک زھرشانی گدان ءَ آتکگ اَنت۔
زھرشانی گدان ءَ اھوالکار نیاز مھمد گوں کھولاں ھمدردی درشان کرتگ ءُ گوشتگ کہ من وتی گنجاھشت ءِ رد ءَ زوریں بیگواھی ءُ انسانی ھکانی بگیریانی سر ءَ الم توار چست کن آں۔
زور بیگواھیں جھانزیب مھمد ھسنی ءِ کھول ءِ گوشگ اِنت کہ ما چنچو سال اِنت کہ پہ جھانزیب ءِ آجوئی ءَ جوڑ کنگ بیتگیں ادارھانی دروازگ ءِ ٹکگ ءَ ابید پر ایمنیں زھرشانی ھم کرتگ دانکہ ڈیھ ءِ ادارھانی نیمگ ءَ مئے گون ءَ انساپ کنگ بہ بیت۔ بلے بژن کہ چہ ڈیھ ءِ ادارھانی نیمگ ءَ مئے گون ءَ انساپ کنگ ءَ ھچ وڑیں گامگیج زورگ نہ بیتگ۔
آئی ءَ گوشتگ کہ ما یکبرے پد ءَ گوں سرکار ءَ لوٹ کن ایں کہ پہ جھانزیب مھمد ھسنی ءِ آجوئی ءَ وتی کرد ءَ پیلو بہ کنت۔
