بلوچ راجی زْرمبشت ( بی این ایم ) ءَ برتانیا ءِ شھر مانچسٹر ءَ بلوچستان ءِ زورگری ءِ روچ ءِ درگت ءَ زھرشانی کرتگ۔27 مارچ 1948 ءَ پاکستان ءَ بلوچستان زور گپتگ ، ھمے روچ ءِ درگت ءَ سیاھیں روچ دارگ بیتگ ، بی این ایم ءِ باسک ءُ دوزواھانی مزنیں کچے ءَ زھرشانی ءَ بھر زرتگ۔
پر ایمنیں زھرشانی ءِ تہ ءَ پاکستانی شھرمنندی ءَ گوں زھرشانی کنوکاں بدزبانی کنان زھرشانی ءِ میان ءَ اڑاند ودی کنگ ءِ کوشست کرتگ۔بلے زھرشانی کنوکاں گوں اوپار ءَ وتی پرایمنیں زھرشانی برجاہ داشتگ۔
گوں مچی ءَ تْران کنان ، بی این ایم ءِ راھشوناں پہ آجوئی ءُ مزدانک ءَ وتی پرایمنیں جھد ءِ برجاہ دارگ ءِ مسام سبزینتگ۔ آیاں چہ میان استمان ءَ لوٹ کرتگ کہ آ بلوچستان ءِ جیڑہ ءِ نیمگ ءَ دلگوش بہ کنت ءُ بلوچ راج ءِ روائیں لوٹانی پلہ مرزی بہ کنت۔
تْران کنوکاں زور داتگ کہ شیتانی ریاست پاکستان ءَ اسلام ءِ نام ءِ بلوچانی آزاتی پچ گپتگ بلے درسیں راھبند سرگْوز کرتگ ءُ گوں سک دلی ءَ بے میاریں مردم نشانگ کرتگ ، لوگ پل اتگ ءُ مردم آزار داتگ اَنت۔ بلوچستان ءَ 76ئیں سالاں سکا تاوان ءُ بیرانی دیستگ۔ بلوچ راج ءِ بنکی شھرمنندی لوٹ نہ منگ ءُ آیانی مردمی اگبال لگتمال کنگ بیتگ اَنت۔ اے رد ءَ مردمی اگبالانی بارہ ءَ گپ جنوکانی بے تواری تورین ایت پرچا کہ بلوچ ءِ پہ مزدانک ءَ گوانک ڈالچار کنگ بیگ ءَ اِنت۔
پر ایمنیں زھرشانی ءِ میان ءَ پاکستانی شھری یے ءَ زھرشانی ءِ تہ ءَ دور کرتگ ، زھرشانی کنوکانی رد ءَ آ گوں بیھاراں کنت کنگ بیتگ اَنت داں نا ایمنی ودی بہ بیت۔ بلے پہ زھرشانی کنوکانی پھریزگ ءَ راھبندپرینوکیں ادارھاں اشتاپی ءَ دزمانجنی کرتگ ءُ اڑاند ودی کنوکیں مردم دزگیر کرتگ۔
بی این ایم ءِ رسانکی کارگشاد کازی داد مھمد ریھان ءَ آئی ءِ منت گپتگ ءُ ماں درانڈیھ ءَ پہ بلوچ سیاسی کارکناں بیم ءُ ترسانی نیمگ ءَ دلگوش گْور کنان زھرشانی کنوکانی پھریزگ ءِ سر ءَ مانچسٹر پولیس ساڑاتگ۔
ھمے پیم چہ بی این ایم ءِ ٹویٹر ءَ ھم زھرشانی ءِ میان ءَ پھازداری کنگ ءِ سر ءَ مانچسٹر پولیس ءِ سروگانانی کرد منگ ءُ آیانی منت گرگ بیتگ۔
