بلوچ یکجھتی کمیٹی ( کراچی) ءِ جارکش ءَ وتی یک درشانے ءَ سکا درد درشان کرتگ ءُ گوشتگ کہ شھیب ءُ شاہ زمان لیاری کراچی ءِ جاہ منندیں مزدور ءُ لیبی اَنت۔ آیان ءَ 18 اگست 2023 ءَ سادگ پوشاک ءُ رینجر ءِ کارمنداں پہ جست ءُ پرس ءِ نام ءَ برتگ ءُ زی چارشمبے 27 مارچ 2024 ءَ آیانی ژانگولیں لاش چگل داتگ اَنت۔
آئی ءَ گوشتگ کہ شھیب ءِ مات ءِ گوشگ اِنت کہ گوستگیں ماہ ءَ پولیس ءُ چیریں ادارھانی کارمند یک ءُ دو ءِ میان ءَ گس ءَ آتکگ ءُ شھیب ءِ مات ءِ پجار کارڈ ءِ اکس گپتگ ءُ برتگ۔ مات ءِ گوشگ اِنت کہ آیاں کول کرتگ تئی زھگ ءَ کار ایں۔
جارکش ءَ گوشتگ کہ شھیب ءُ شاہ زمان ءِ آوار جنگ ءُ آیانی ژانگولیں لاشانی چگل دیگ کجام مردمگری اِنت۔ لیاری ءَ ھمک شپ پہ لشکرکشی ءِ نام ءَ مردمانی گساں بیڑ برگ ءَ اَنت۔ ورنایاں آوار جنگ ءُ آیانی کھول ءِ مردماں بیھار دے اَنت کہ ھچ مہ گوش ات شمئے زھگ ءَ واتر کار ایں اگاں شما توار چست کرت گڑا آئی لاش چگل دیگ بیت۔ پہ وتی زھگانی ترس ءَ اے مردم ھچ نہ گوش اَنت ءُ سالانی سال وتی زھگانی ودار ءَ کن اَنت۔
آئی ءَ گوشتگ کہ لیاری ءُ کراچی ءِ آدگہ ھنداں مردم انچوش ترس آماچ کنگ بوتگ اَنت کہ آیانی زھگ بیگواہ کنگ بنت بلے آ رسانکدر ءَ ھچ گپ نہ کن اَنت ءُ ھمے سوب ءَ چیریں ادارھان ءَ موہ رسگ ءَ اِنت ھمک شپ کراچی ءِ جتائیں ھند ءُ تیوک ءَ لیاری ءَ مردمانی گساں بیڑ برگ ءَ اَنت۔ پہ اے ناشریانی گر ءُ دار ءَ زور بیگواھیں مردمانی کھولاں ھوار درسیں مردم دوستاں توار چست کنگ لوٹ ایت۔
