شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5396 روچ سرجم بوتگ۔ سے شمبے ءِ روچءَ چہ ھزدار ءَ مردمی ھکانی کارکن ءُ اھوالکار نئیمہ ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ وتگڑیں راجمستری سرکار ءُ آمیدگس ءِ ٹاپار جنوکانی ساڑی بوگ ءَ چیریں ادارھانی دست ءَ مردمی ھکانی لگتمالی برجاہ اِنت، اے پہ ایمنی ءُ انساپ ءَ گپ جنوکانی دیم ءَ ترندیں شھماتے۔
آئی ءِ گوشتگ کہ بلوچستان ءَ مردمی ھکانی لپاشگ ترندبوتگ، زوریں بیگواھی ءُ لاشانی چگل دیگ ءَ ریاستی ادارہ تچکی ءَ ھوار اَنت۔ ایشانی بارو ءَ رسانکدر ءُ آمیدگس ءَ ھوارپاکستان ءُ میان استمانی مردمی ھکانی ادارھاں ھم باز رند ءَ گپ جتگ، چہ ایشی ءَ اَبید انگت ءَ شریں گامگیج زورگ نہ بوتگ۔
ماما کدیر گوشتگ کہ ما گوں اکوام متھدہ ءُ مردمی ھکانی ادارھانی گون ءَ لوٹ کناں کہ آ بلوچستان ءَ برجاھیں زوراکی، مردمی ھکانی لپاشگ ءُ میان استمانی مردمی ھکانی کانودانی لگتمالی ءِ بگیری ءَ گامگیج بزور اَنت۔
