جنگ ءَ شھید بوتگیں جنگی سپاھیانی لاشانی دزگرگ ءَ آتکگیں کھولاں درکانودی شرتانی سر ءَ سوگند دیگ شرم ءِ گپے۔
بلوچ راجی زرمبشت ( بی این ایم ) ءِ سرکماش ءَ گوشتگ کہ پاکستان تچکی ءَ بلوچستان ءَ میان استمانی جنگی کانودانی بگیری ءَ کنگ ءُ جنگی میارباری کنگ ءَ اِنت۔ شھیدانی لاشاں کمشرپ کنگ، کھولاں ناھک، درکانودی، درمردمی ءُ میان استمانی واک تیوک ءَ جنیوا کنونشنز ءِ بگیری ءَ شرت ءُ سوگند ءِ نام ءَ دزرند گرگ ءَ آیانی ٹپانی سر ءَ واد پریچگ اِنت۔ اے کار سکا بے دود، بے شرم ءُ میان استمانی کانود ءِ تچکی ءَ بگیری اِنت۔
ڈاکٹر نسیم ءَ گوشتگ کہ ما سرجمیں جھان ءَ تچکی ءَ گوشگ لوٹ ایں کہ بلوچستان ءَ آجوئی جنگ ءِ یک زرمبشتے برجاہ اِنت۔ اے زرمبشت سکا شاھگان اِنت۔اود ءَ یک سلاہ بندیں جھدے بوگ ءَ اِنت۔ سلاہ بندیں جھد تیوگیں جھان ءِ آشوبی ءُ آجوئی زرمبشتانی بھر بوتگ اَنت۔ اے جنگانی گوستانک گیشتر جھان ءَ ھست اَنت ءُ نکشانی مانزمان اَنت۔ بلوچ چہ دھکان پہ وتی سرڈگار، راجی پدریچ، راجی ھستمان ءِ پھریزگ ءَ جھد کنگ ءَ اِنت۔
آئی ءَ گوشتگ کہ پاکستان وتی جوڑ بوگ ءِ ھپت ماہ ءَ رند آجو ءُ وتواکیں بلوچستان ءَ گوں توپک ءِ زور ءَ دستیگ کنت۔ بلوچ راج ءَ بنداتی روچ ءَ پاکستان ءِ زورگپتی نہ منّ اتگ ءُ آجوئی زرمبشت ءِ جار جتگ۔ چہ ھما روچ ءَ پاکستان ءِ بگیری ءَ یک سلاہ بندیں جھدے بندات بوتگ۔ بنداتی سلاہ بندیں جھد آگا ابدالکریم ءِ سروکی ءَ بوتگ۔ چہ ایشی ءَ پد جھد چہ جتائیں وھداں گوزگ ءَ بوتگ۔ ھمے کہ انوں بندات بوتگیں زرمبشت ءِ سروکی ءَ بیست ءُ چار سال اِنت کہ برجاہ اِنت۔
ڈاکٹر نسیم ءَ گوشتگ کہ پاکستانی لشکر مردمی بستار ءُ میان استمانی کانود ءَ زبھر اِنت۔ کودکیں مردمانی دزگیر کنگ آزار دیگ ءَ پد کوش، سدانی کچ ءَ لشکر ءِ دست ءَ دزگیر ( زور بیگواھیں) مردم کشگ ءُ مچی مانشان کل کنگ، ھزارانی کچ ءَ مردم زور لشکری چیریں آزارجاھاں بیگواہ اَنت، میتگانی ماندارگ پاکستانی لشکر ءِ نیمگ ءَ دودے جوڑ بوتگ۔ ایشی ھواری ءَ سلاہ بندیں جھد ءَ پرکاریں آجوئی ءِ سپاھیگانی لاشانی کمشرپ کنگ، آیاں گاڑیانی پشت ءَ بندگ ءُ گراں کنگ، لاشاں کھولانی دست ءَ نہ دیگ، ٹکٹر ءِ سر ءَ کڈ جنگ ءُ درمردمی وڑ ءُ پیماں بار دیگ ءُ شھیدانی مانشانی کمشرپ کنگ پاکستانی لشکر ءِ ابرم ءَ ھوار اَنت۔
آئی ءَ گوشتگ کہ انوں لھتیں ماھانی جنگ ءَ پاکستانی لشکر ءَ جنگ بوتگیں بلوچ آجوئی لوٹوکانی لاشانی دزگرگ ءَ شتگ ایں کھول کمشرپ کرتگ اَنت ءُ اے رستری ءُ جنیوا کنونشز ءِ تچکی ءَ بگیری اِنت سوگند ءِ نام ءَ دز رند گرگ ءَ بے شرمیں کارے بندات کرتگ ئے۔ اے جنیوا کنونشن ءِ آرٹیکل 15 ءِ بگیری اِنت کہ میڑ ءَ جنگ بوتگیں مردم ءُ آیانی کھولانی گون ءَ پہ شرپ پیش بوگ ءِ پرمان ءَ دنت۔ جنیوا کنونشن ءِ آرٹیکل 15 ءَ سلاہ بندیں میڑ ءِ میان ءَ جنگ بوتگیں مردمانی گون ءَ ھمگرنچ یا بستار ءَ ابید، آیانی گون ءَ گوں شرپ ءَ پیش بوگ ءِ بستار ءِ سر ءَ زور دنت بلے پاکستان ریاست آجوئی لوٹوکیں شھیدانی کھولاں آزار دنت ءُ ترسینگ ءَ ابید درمردمی شرت ءِ سر ءَ سوگند دیگ نہ تیوک ءَ مردمی بستار ءِ پادمال کنگ اِنت، بلکیں جنیوا کنونشز ءِ تچکی ءَ بگیری اِنت۔
ڈاکٹر نسیم ءَ گوشتگ کہ پاکستان نہ تیوک ءَ آرٹیکل 15 بگیری ءَ کنگ ءَ اِنت، بلکیں سلاہ بندیں جنگ ءِ میان ءَ جنگول، جنگی بندیگانی گون ءَ رویشت، لس شھریانی پھازداری، سانمندیں کھولانی دوبر ھمسنتی، کھولانی زندمان ءِ شرپ، زھگانی پھازادری، مچی سزا ءُ کانود ءِ لگتمالی ءِ وڑیں جیڑھانی سر ءَ جنیوا کنونشنز ءِ جتائیں شکانی تچکی ءَ بگیری ءَ کنگ ءَ اِنت۔
بی این ایم ءِ سرکماش ڈاکٹر نسیم ءَ گوشتگ کہ اکوام متھدہ ءِ سر ءَ پرز بیت کہ بلوچستان ءَ برجاھیں جنگی میارباریانی بگیری کنگ ءَ پاکستان ءَ جست بہ کنت ءُ دانکہ مردمی کمشرپی ءِ درچ بند بہ بیت۔
