آواران: جاؤ ءَ زورگریں پاکستانی لشکر ءِ دست ءَ زور بیگواہ کنگ بوتگیں ڈاکٹر تاھر ءُ زپر ءِ کھول ءَواجہ ءِ باگ ءَ زھرشانی ءَ آواران لسبیلہ دگ بند کرتگ۔ زھرشانی ءَ سیاسی ءُ چاگردی کارکن، زھگ ءُ جنیناں بازیں کچے ءَ بھر زرتگ۔
دگ ءِ بند بوگ ءِ سوب ءَ دوئیں نیمگاں گاڑیانی مزنیں کتار اوشتوک ءُ مساپر سکا جنجالانی دیمپان بوتگ اَنت۔ زھرشانی کنوکاں تاھر ءُ زپر ءِ زوریں بیگواھی ءَ ھوار زوریں بیگواھی ءُ بلوچ چکچینی ءِ بگیری ءَ اوگام جتگ ءُ درسیں بیگواھیں مردمانی آجوئی ءِ لوٹ کرتگ۔
زھرشانی کنوکیں مردمانی گوشگ اِنت کہ تاھر ءُ زپر میاریں ورنا اَنت آیاں گوں دگہ ھچ وڑیں چست ءُ ایراں کار نہ بوتگ۔ زی سھبءَ پاکستانی لشکر ءَ تاھر ءَ وتی بنجل ءَ لوٹاھینتگ ءُ بیگواہ کرتگ۔ دو روچ پیش پاکستانی لشکرءَ شپ ءَ کوٹو ءَ بیڑ برتگ ءُ زپر آوار جتگ ءُ بیگواہ کرتگ۔
آیانی گوشگ اِنت کہ اگاں مئے زھگ سرکار ءِ میار بار اَنت ءُ آیانی سر ءَ چونیں بھتام ھست گڑا آمیدگس ءَ پیش کنگ ءُ سزا دیگ بہ بنت، اے وڑ ءَ درکانودی آوار جنگ ءُ بیگواہ کنگ ءَ تیوگیں کھول جنجالانی دیمپان اَنت۔
زھرشانی کنوکیں مردمانی گوشگ اِنت دانکہ زور بیگواھیں آزیز یل کنگ نہ بوتگ اَنت ما وتی زھرشانی ءَ برجاہ دار ایں، ما گوں سرکار ءَ لوٹ کن ایں کہ پہ مئے زھگانی آجوئی ءَ گامگیچ بہ زور ایت ءُ مئے زھگ زوت آجو کنگ بہ بنت۔
یات بہ بہ اِت کہ زور بیگواھیں ڈاکٹر تاھر ء مھمد امر جاؤ ءِ میتگ ملان ءِ جاہ منند اِنت کہ 23 مارچ ءِ سھب ءَ پاکستانی لشکر ءَ تھسیل کیمپ ءِ بنجل ءَ لوٹائینتگ ءُ بیگواہ کرتگ۔ چہ ایشی ءَ پیش ھم ڈاکٹر تاھر زور بیگواہ کنگ بوتگ۔
زور بیگواھیں زپر ء اکبر جاؤ ءِ میتگ کوٹو ءِ جاہ منند اِنت کہ زورگریں پاکستانی لشکر ءَ دو روچ پیش شپ ءَ گس ءَ بیڑ برتگ ءُ آوار جنگ ءَ پد بیگواہ کرتگ۔
