بلوچ راجی زْرمبشت (بی این ایم ) جرمنی تک ءَ 27 مارچ ،پاکستان ءِ سر ءَ بلوچستان ءِ زورگری ءِ روچ ءِ درگت ءَ سیاھیں روچ داشتگ ءُ زھرشانی کرتگ۔ 27 مارچ 1948 ءَ پاکستانی لشکر بلوچستان ءَ پترتگ ءُ بلوچستان زور گپتگ ئِے۔چہ ھما روچ ءَ بلوچستان ءِ مردماں پاکستان رد کرتگ ءُ آئی ءِ زورگری ءِ بگیری ءَ گھگیری کنگ ءَ اَنت۔
زھرشانی ءِ میان ءَ مردماں پنتاک دیگ بیتگ ءُ آ بلوچستان ءِ گْوستانک ءِ پجیگ ءَ بلوچستان ءَ برجاھیں پاکستانی زوراکیانی بارہ ءَ ھم سھی کنگ بیتگ اَنت۔
بلوچ راجی زْرمبشت ( بی این ایم ) ءِ بنجاھی پتر ءِ باسک ھمل ءَ اے دم ءُ درگت ءَ تْران کنان ءَ گْوشتگ اے بلوچ راج ءِ سیاہ تریں روچ اِنت بلے بلوچ راج زمانگ ءِ رشت ءَ وتی پلو ءَ ترین ایت۔آئی ءَ 27 مارچ ءِ پژدر ءَ ھم گپ جتگ۔
بلوچ راجی زْرمبشت ( بی این ایم ) جرمنی تک ءِ سروک ازگر الی ءَ گوں مچی ءَ گْوشتگ چیردستی ءِ بگیری ءَ توار چست کنگ مئے راجی زمہ واری اِنت۔ پاکستان ءَ 27 مارچ 1948 ءَ بلوچستان زور گپتگ چہ ایشی ءَ بلوچ راج مزنیں جیڑھانی دیمپان اِنت۔
آئی ءَ گْوشتگ پہ پر ارزشتیں راجی سیتاں مارا چہ وتی لوگانی چار داراں در کپگ ءُ یکجا بیگ لوٹ ایت داں وت ءَ چہ اے چیردستی ءَ در کرت بہ کن ایں کہ ما ایشی ءَ چہ گْوستگیں 76 سال ءَ سگگ ءَ ایں۔
گوں ھندی اھوالکاراں گپ جنان آئی ءَ زور داتگ ، بلوچستان بھ پاکستان ءِ بھر نہ بیتگ ، ءُ جھان ءَ اے گپ منگی اِنت۔بلوچ راج پاکستان ءِ زوراک ءُ زورگریں سرکار ءَ اوپار نہ کنت۔بلوچ راج ءَ پاکستان ءِ زورگری ءِ بگیری ءَ ھون ءُ ھید ریتکگ ءُ جھد کرتگ۔مئے لوٹ آزادیں بلوچستان اِنت۔داں ھما وھد ءَ کہ پاکستان ءِ زورگریں سرکار ءِ لوپ مئے گٹ ءَ اِنت ما وتی جھد ءَ آسر نہ کن ایں۔
بلوچ راجی زْرمبشت ( بی این ایم ) جرمنی تک ءِ کمک کارگشاد شرھسن ءَ جرمنی سرکار ءِ سر ءَ زور داتگ کہ آ پاکستان ءَ سلاھانی دیگ ءَ بند بہ کنت۔آئی ءَ گْوشتگ ، پاکستان لشکر بلوچستان ءَ پہ بے میاریں مردمانی کشگ ءَ اے سلاھاں کارمرد کنگ ءَ اِنت۔
