بلوچ نیشنل موومنٹ ( بی این ایم ) ءَ ماں رسانکدر ءَ وتی شنگ کرتگیں درشانے ءَ گوشتگ کہ بی این ایم زرباری کوریا چیپٹر ءِ نیمگ ءَ گوستگیں روچ ءَ بوسان ءَ زھرشانی کنگ بیتگ۔ ایشی ءِ مول بلوچ یکجھتی کمیٹی ( بی وائی سی ) ءِ سروک ءُ کارکنانی سر ءَ برجاھیں زوراکیانی بگیری ءَ توار چست کنگ بیتگ۔ اے زھرشانی ءِ مول ھما بلوچ کارکنانی سر ءَ بیوکیں زوراکیانی دیم ءَ آرگ بیتگ کہ پہ وتی بنیادی ھک ءُ پہ شرپداریں زندگی ءَ جھد کنگ ءَ اَنت۔
آئی ءَ گوشتگ کہ زھرشانی ءِ میان ءَ کوریا زبان ءَ تران کنگ بیتگ ءُ ھندی مردمان ءَ بلوچستان ءَ برجاھیں انسانی ھکانی ناھکیں لگتمالی ءِ بابت ءَ سرپدی دیگ بیتگ۔ زھرشانی ءِ میان ءَ پاکستان ریاست ءِ نیمگ ءَ پہ بلوچانی توار ءِ دارگ ءَ آزار دیگ ءِ جھد ءِ ایر جنگ ءَ اوگام جنگ بیتگ ءُ انساپ ءِ لوٹ کنگ بیتگ۔
آئی ءَ گوشتگ کہ زھرشانی کنوکاں لوٹ کرتگ ڈاکٹر ماہ رنگ بلوچ، بیبوبلوچ، بیبگر بلوچ، شاہ جی بلوچ ، گلزادی بلوچ ءَ ھوار آدگہ دزگیر کنگ بیتگیں کارکن زوت یل کنگ بہ بنت کہ آ ناھک ءَ دزگیر کنگ بیتگ اَنت۔ آئی ءَ گوشتگ کہ دیمتر ءَ چہ بی این ایم ءِ نیمگ ءَ سدانی کچ ءَ پنتاک بھر ءُ بانگ کنگ بیتگ دانکہ ڈاکٹر ماہ رنگ بلوچ ءِ زوریں بیگواھی ءُ پر ایمنیں زھرشانی کارکنانی بگیری ءَ برجاھیں ریاستی زوراکیانی بابت ءَ سرپدی دیگ بہ بیت۔
