بلوچ یکجھتی کمیٹی ءِ ( کراچی ) ءِ جارکش ءَ وتی شنگ کرتگیں درشانے ءَ گوشتگ کہ بی وائی سی ( کراچی ) ءِ ھمبلاں گوادر ءِ کرءُ کشاں چہ ھوراں ھار آماچیں مردمانی گون ءَ اوشتگ ءِ سوڑگ کرتگءُ اے درگت ءَ کمکی پترے ٹاھینتگ ءُ آرگنائزر آمنہ ءِ اکاونٹ ءَ کمک ءِ لوٹ کرتگ۔
آئی ءَ گوشتگ کہ داں انوں چنچو کمک یکجاہ کنگ بوتگ آیان ءَ پیشکان، گنز ءُ گوادر ءِ گساں 200 راشن ءِ پیکٹ داتگ کہ آیانی تہ ءَ آرت، برنج، دال، تیل ءَ ھوار آدگہ سامان ھما ھندا نی لھتیں ھما گساں داتگ کہ پرشت ءُ پروش بوتگ اَنت، پہ آیانی بنکی لوٹاں پنجاہ ءُ پنچ ترپال دیم داتگ۔
آئی ءَ گوشتگ کہ پیشکانءُ گنز ءَ باز انچیں گس ھست آیاں چوشیں مردیں نیست کہ آیان ءَ آسراتی بہ دنت اگاں ھست آ نادراہ اَنت اے ھور ءُ ھار آماچی ءَ پد ھچ کرت نہ کن اَنت۔
آئی ءَ گوشتگ کہ ھمے ھنداں باز گساں لین ءِ نزام ءِ بنیاد ھمے ھاراں تباہ کرتگ اَنت ءُ ھمے سوب ءَ لین ءِ ھچ وڑیں آسراتی نیست۔ ھمے سوب ءَ روچ گوز ایت بلے دیگر ءَ پد گوں موم بتی ءَ زند گوازینگ لوٹ ایت، سرکار ءِ نیمگ ءَ انگت ءَ دلگوش دیگ بوگ ءَ نہ اِنت۔
آئی ءَ گوشتگ کہ بی وائی سی کراچی ءِ کیبنٹ ءَ پہ پنچ گساں سولیر دیگ ءِ سوڑگ کرتگ ھما گس کہ آئی جنین جنوزام بہ بنت یا مرد ھست بلے آپہ گس ءِ آسراتی دیگ ءَ سکا نزور اَنت۔ پیشکان ءِ ھمبلانی کمک ءَ ما پچ انچیں گسان ءَ سولر داتگ ءُ کمکی تکشام ءِ ھلاسی ءِ جار ءَ جن ایں۔
