راجانی سنت ءِ مردمی اگبالانی پتر ءِ 55 می نیاد ءِ میان ءَ بلوچ راجی زْرمبشت ( بی این ایم ) ءِ دری کارانی تک ءِ جھگیر ھکیم ءَ ماں بلوچستان ءَ پہ پاکستان ءِ چکچینی ءِ شونداتانی گر ءُ دار ءَ میان استمانی دزمانجنی ءِ لوٹ کرتگ۔
آئی ءَ گْوشتگ چہ راجانی سنت ءِ نیمگ ءَ بلوچستان ءِ آجوئی ءِ زْرمبشت ءِ زیتیں پلہ مرزی المی اِنت۔
گوں پتر ءَ گپ جنان ءَ ھکیم ءَ پاکستان ءِ زیردستی ءَ بلوچستان ءِ مردمانی سر ءَ بیوکیں دھکاں برجاھیں زوراکیانی نیمگ ءَ دلگوش گْور کنائینتگ۔ آئی ءَ چہ 1948 ءَ بلوچستان ءِ زور گرگ ءَ پد پاکستان ءِ تْرام اتگیں ناراھی ایر جتگ اَنت، کہ آیانی تہ ءَ سیاسی پدمنتگی، گزرانکی لگتمالی ءُ ربیدگی زوراکی ھوار اَنت۔
آئی ءَ راجانی سنت ءِ سر ءَ زور داتگ کہ آ بلوچ راج ءِ وتواجھی ءِ روائیں واھگاں بہ من ایت پرچا کہ اے اگبال راجانی سنت ءِ مسام ءَ نبشتگ۔
آئی ءَ زور داتگ ءُ گْوشتگ بلوچ راج ءَ پرایمنیں رنگے ءَ پہ آجوئی ءَ جھد کرتگ ، آئی ءِ مزد ءَ آ پاکستانی مھترھند ءِ آزار ، بیھار ءُ زوراکیانی دیمپان بیتگ اَنت۔
بلوچ راجی زْرمبشت ( بی این ایم ) ، بلوچ نودربر گل ۔ آزات ءِ پجیگ ءَ دگہ گلانی سر ءَ پابندی جنگ ءُ بلوچ راج ءِ سیاسی سرگرمیاں اگبال پچ گرگ بوت۔
بی این ایم ءِ جھگیر ءَ زور بیگواھی ، در آمیدگسی کوش ءُ ناراھیں دزگیری ناپتیانی ایرموش کنگ ءُ بلوچ گھگیری ءِ لپاشگ ءَ پاکستان ءِ ھم روچیگی کارپد لیک اتگ اَنت۔
آئی ءَ چہ میان استمان ءَ بلوچ ءِ وتواجھی ءِ زْرمبشت ءِ پلہ مرزی ءِ لوٹ کرتگ ءُ راجانی سنت ءِ سر ءَ زور داتگ کہ آ اے گپ ءَ المی کنائینگ ءَ زیت دزمانجنی بہ کنت داں بلوچستان ءِ مردم بے گر ءُ بند ءَ وتی باندات ءِ شور ءَ کرت بہ کن اَنت۔
گڈ سر ءَ اے آزگیں جیڑہ ءِ نیمگ ءَ دلگوش گْور کنگ ءِ سر ءَ ھکیم ءَ پتر ءِ منت گپتگ۔
