شال: بیگواھیں بلوچانی توار ( وی بی ایم پی ) ءَ ماں رسانکدر ءَ وتی شنگ کرتگیں درشانے ءَ گوشتگ کہ ھدا داد ءُ آسپ شاھوانی ءِ زوریں بیگواھی ءِ کیس کھول ءَ وی بی ایم پی ءِ کِر ءَ یاداشت کرتگ اَنت۔
آئی ءَ گوشتگ کہ کھول ءَ گوں گل ءَ گوشتگ کہ ھدا داد کرکی، سامی تربت ءِ جاہ منند اِنت سرگودھا جاندراھی تک ءِ نودربرے ھشت مارچ ءَ بچکانی وانگجاہ ءِ وابجاہ ءِ نزیک ءَ الرشید نادراھجاہ بھادر شاہ زپر سرگودھا ءَ پاکستانی لشکر ءَ درکانودی آوار جتگ ءُ چیریں آزار جاھے ءَ بندیگ کرتگ۔
وی بی ایم پی ءِ گوشگ اِنت کہ مھمد آسپ شاھوانی ء ھان مھمد ءَ سی ٹی ڈی ءُ آدگہ لشکری کارمنداں 10 مارچ ءَ چکل میاں ھان کیچی بیگ شال ءَ چہ آئی جند ءِ گس ءَ آوار جنگ ءَ پد زور بیگواہ کرتگ۔
آئی گوشتگ کہ دوئیں زور بیگواھیں ورنایانی کھولانی گوشگ اِنت کہ آیانی بیگواھیں آزیزانی بارو ءَ ھچ وڑیں سرپدی دیگ ءَ نہ اَنت ھمے سوب ءَ سکا جنجالانی دیمپان اَنت۔
بیگواھیں بلوچانی توار ( وی بی ایم پی ) ءِ سرکماش نسر اللہ ءَ گوشتگ کہ دوئیں ورنایانی زوریں بیگواھی یک درکانودی، بے راھبندیں کارے ءُ مردمی ھکانی لپاشگ اِنت۔ ایشی ایرجن آں ءُ گوں سرکار ءَ لوٹ کن آں کہ ھدا داد ءُ مھمد آسپ شاھوانی ءِ سر ءَ چونیں بھتام ھست گڑا دیم ءَ آرگ ءُ آمدگس ءَ پیش کنگ بہ بنت ڈیھ ءِ کانود ءِ رد ءَ وتی بے میار پیش کنگ ءِ موہ ءَ بہ دے اَنت۔ اگاں آ بے میار اَنت گڑا زوت یل کنگ بہ بنت ءُ کھولاں چہ درد ءُ اندوھاں بہ رکین اَنت۔
