بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ پاکستانی لشکر ءِ چریک ءُ کمکار بالاچ بشیر ءِ کوش ءِ زمہ واری ءَ منّ ایت۔
آئی ءَ گوشتگ کہ بالاچ ء بشیر جھمنند تمپ بالیچہ لھتیں سال ءَ گوں بی ایل ایپ ءَ ھمگرنچ بیتگ بلے 2019 ءَ ریاست ءِ لشکر ءِ دیم ءَ توپک ءِ چگل دیگ ءَ پد تچکی ءَ دژمن ءِ چیریں ادارہ پہ ایم آئی ءَ کار کنگ ءَ بیتگ۔
جارکش ءَ گوشتگ کہ آ بلوچ جھدکار شیھک بلوچ پنام ناکو تلانگ، کامران پنام نودی ءُ جاپر پنام سنا ءَ ھوار آدگرانی شھید کنگ ءَ ھوار بیتگ۔
آئی گوشتگ کہ ریاست ءِ چریک بالاچ بشیر لشکرکشی ءِ نام ءَ پاکستانی لشکر ءِ بازیں زوراکیاں ھوار بیتگ ءُ دُژمن ءِ کمکار جوڑ بیتگ کہ ایشانی تہ ءَ مزن بند، کلبر ءُ ناسرآباد ءَ ھوار بازیں دمگاں لشکرکشیاں گون بیتگ۔
جارکش ءَ گوشتگ کہ چاگردی سلکاریاں ھوار بازیں بےمیاریں مردمانی کوش ءُ زور بیگواہ کنگ ءَ ھوار بیتگ۔
آئی ءَ گوشتگ کہ بلوچ چکچینی ءُ گوں سرڈگار ءَ راجدروھی ءِ میارباری ءَ پد ریاست ءِ چریک ءُ کمکار بالاچ بشیر بلوچ سرڈگار ءُ پہ راجی سلامتی ءِ تاوان دیگ ءِ بنیاد ءَ تیر جتگ ءُ کُشتگ، ایشی ءِ زمہ واری ءَ بی ایل ایپ منّ ایت۔
میجر گھرام ءَ گوشتگ کہ بلوچ سرڈگار ءُ گوں بلوچ راج ءَ راجدروھی ءُ پہ زورگریں ریاست ءُ بلوچ چکچینی ءُ زور بیگواھیاں کمک کنوکیں دُرسیں مردم مئے نشانگ ءَ اَنت۔
