کیچ ءِ ھند ھوشاپ ءَ چہ پاکستانی پوج ءِ نیمگ ءَ لس آبادیانی سر ءَ مارٹر گولا آس دیگ ءَ پنچ مردم ٹپی بیتگ۔
زرمبش جھگیر ءِ رد ءَ پاکستانی پوج ءَ مرچی شپ ءِ ھشت ءَ ھوشاپ ءِ میتگ گروک ءَ آبادیانی سر ءَ مارٹر گولا آس داتگ چہ ایشی آسر ءَ جنین ءُ زھگ ٹپی بیتگ اَنت۔
ھندی بنشون ءِ رد ءَ ٹپی بیتگیں مردم پہ الاج کنگ ءَ نادراھجاہ ءَ برگ بیتگ اَنت کہ یک زھگے ءِ جاور ناگیگ اَنت۔
چہ ایشی ءَ پیش 10 اکتوبر 2021 ءَ ھوشاپ ءِ پرکوٹگ ءَ چہ پاکستانی پوج ءِ وتسریں تیرگواری ءُ گولا ءِ آس دیگ ءَ دو کسان سالیں زھگ شراتون ء اَبدُلواھد ءُ اللہ بکش ء اَبدُلواھد بیران ءُ دگہ یک زھگے ٹپی بیتگ اَت۔ بیران بیتگیں زھگانی کھولاں تُربَت ءَ ھوار شال ءَ ھم شتگ ءُ زھرشانی کرتگ اَت۔
