بلوچ اسٹوڈنٹس کونسل، پنجاب ءِ جارکش ءَ وتی شنگ کُرتگیں درشان ءَ گْوستگیں روچ ءَ وِندر دگ ویل ءَ نمیران بوتگیں بلوچ ورناہ ءُ بی ایس سی ءِ باسک سنگت شھیب ءُ زاھر ءُ آیانی ھمراہ شھاب ، شیھک، اھمد ءُ سھیل ءِ نمیرانی ءَ موتک درشان کنان ءَ گوشتگ کہ اے دابیں سوھو ءُ باسمائیں ورناھانی گِسر کپگ پہ راج ءَ مزنیں تاوانے کہ ایشانی ھورک ءُ ھالیگیں جاہ ءِ پُر کنَگ ارزان نہ اِنت۔
آئی ءَ گوشتگ کہ سنگت شھیب بلوچ بی ایس سی (یو ایم ٹی ) لاھور ءِ یک زمّہ واریں باسکے بوتگ کہ آ گوں وتی سیاسی سنچ ءُ زانت ءَ اے مْیان ءَ پہ ادارہ ءِ دیمروئی، مُھکمی ، ءُ بلوچ نودربرانی باندات ءَجُتائیں کردے پیلو کنگ ءَ بوتگ۔ سنگت شھیب ءَ 2021 ءَ یو ایم ٹی لاھور ءَ بھر زُرتگ ءُ تب زانتی (سائیکولوجی) وانگ ءَ بوتگ، سنگت دو رند ءَ بی ایس سی (یو ایم ٹی) کابینہ ءِ بھر بوتگ۔ سنگت23-2022سیشن ءَ اکیڈمک سیکریٹری ءِ اُگدہ ءِ سرا بوتگ 2024-2023ءَ ایڈوائزر ٹو چیئرمین ءِ اُگدھے گون بوتگ ءُ وتی کاراں پہ سِتک دیم ءَ جُنزینگ ءَ بوتگ۔
جارکش ءَ گوشتگ کہ سنگت زاھِر بی ایس سی (بھاولپور) ءِ باسکے بوتگ ءُ یک سرپد ءُ آشنائیں نودربرے ءِ بستار ءَ مُدام ماں راجمانی ءِ پڑا ساری ءُ ساڑی بوتگ ءُ وھَدءِ لوٹانی پَدا کارا بوتگ۔ سنگت زاھر 2019 ءَ بھاولپور زانشتجاہ ءَوانگ بندات کرتگ ءُ ماں انٹرنیشنل ریلیش ءَ ، ءُ 2023 ءَ وتی سنَد پہ سوبمندی گپتگ واتر بلوچستان ءَ شُتگ۔ اے مْیان ءَ سنگت یک رندے بی ایس سی(بھاولپور) کابینہ ءِ فناس سیکریٹری بوتگ ءُ ادارہ ءِ مُھکمی ءَ پہ وتی بے بھائیں وھَد داتگ ءُ وتی کِرد ئے پیلو کُرتگ۔ ھمے وڑا شَھاب، شیھک ، اھمد ءُ سھیل سیاسی ھَوالہ ءَ شیوار ءُ سرپدیں ورنا بوتگ اَنت ءُ جُتا جُتائیں ھَنداں وانگ ءِ ھَواری ءَ چاگردی زمّہ واریاں ھَم سرجم کنگ ءَ بوتگ اَنت۔
جارکش ءَ دیمترا وتی درشان ءَ گوشتگ کہ اِستانی ایردستی ءِ پَدا بلوچ راج ءِ مروچی وڑ وڑا چُک چینی بوھگ ءَ اِنت۔ برے دْروگیں کوش (فیک انکاؤنٹر ) ءِ نام ءَ ورناھانی ژانگولیں جون دزکپگ ءَ اَنت، برے مزھبی ناشرکاریءِ نام ءَ اُستاد ءُ نوربرنشانگ کنگ بوھگ ءَ اَنت ، ءُ برے دَگ ویل (روڈ ایکسیڈنٹ) آنی نام ءَ بیران بوھگ ءَ اَنت۔ اے دْرستانی پُژدر ءَ اگاں ما ھورتی ءَ گوں چار ءُ تپّاسگ ءِ جُھد ءَ بہ کنیں ایشانی بُن وڑے نا وڑے ءَ گوں ایردستی ءِ روتگاں سَک اَنت۔ دیمروئی ءِ نام ءَ اِستان ءِ جوڑ کُتگیں ھونواریں دَگاں ھر روچ تاسُکیں بلوچ ورنا نمیران بوھگ ءَ اَنت ءُ اِستان ھمیشاں چہ پاھِدگ زورگ ءُ وتی زوراکیاں ودّینگ ءَ اِنت۔ یک نیمگے بلوچستان ءِ مادنانی لُٹ ءُ پُل کنگ ءُ پنجاب سنگارگ بوھگ ءَ اِنت ءُ دومی نیمگ ءَ اود ءِ جاھمنند ھر روچ گار کنگ ءُ کُشگ بوھگ ءَ اَنت۔ جارکش ءَ گڈی ءَ نمیرانیں سنگت شھیب ءُ زاھر ءَ ھَوار کُلّیں نمیران بوتگیں سنگتاناں دْروت ندر کناں ءَ گُوشتگ اے کھرآماچیں ساھَتاں ما گوں آیانی کھول ءِ گماں شریدار ایں۔ سنگتانی جھد ءُ کسان اُمبری ءَ پہ بلوچ ءَ داتگیں کُربانی بے مٹ اَنت ءُ اے مئے ایمان اِنت سنگتانی گچین کُتگیں راہ ءِ سرا ما کار کنیں ءُ پہ سِتک وتی زمہ ءِ کِرد ءَ پیلو کن ایں۔
